Соңғы екі апта ішінде Ақтөбедегі «Посейдон» жеке бассейнінде екі ер адам көз жұмды. Бұл туралы Ақтөбе облыстық полиция департаменті хабарлады.
Марқұмдардың бірі 38 жаста, екіншісі 27 жаста болған. Екеуі де бұл бассейнге бұрын да келген.
Қазір сот-медициналық сараптама жұмыстары жүріп жатыр. Тергеу аясында нысан әкімшілігінің қауіпсіздік ережелерін сақтауына баға беріледі.
Полиция аталған деректер бойынша ҚР ҚК 306-бабының 2-бөлігі («Абайсызда адам өліміне әкеп соқтырған қауіпсіздік талаптарына сай келмейтін қызмет көрсету») бойынша сотқа дейінгі тергеуді бастады.
Бассейн әкімшілігі нысанның «техникалық себептерге» байланысты уақытша жабылғанын мәлімдеді.
Бес жыл бұрын аталмыш бассейнде жүрек жеткіліксіздігінен зейнеткер көз жұмған.
Естеріңізге сала кетейік, шілде айында Атыраудағы Palma аквапаркінде 14 бала хлор буымен уланды. Полиция бұл жағдайға байланысты іс қозғады.
фото: 2gis.kz
