Арғын Нығматулин қылмыстық іс қозғалғанға дейін елден кетіп қалған. Бұл туралы Антикор төрағасының орынбасары Дархан Құрақбаев айтты.
«Біз оның Қазақстанда жоқ екенін білеміз. Тергеу басталғанға дейін ол Қазақстанда болмаған. Іздеу жұмыстары жүріп жатыр», – деді Құрақбаев.
6 наурызда Бас прокурордың орынбасары Әсет Шындалиев Арғын Нығматулинге халықаралық іздеу жарияланғанын мәлімдеді. Арғын Нығматулиннің ісі Бас прокуратураға 2024 жылдың желтоқсанынында жеткен.
Нұрлан Нығматулин 2022 жылдың 1 ақпанында Мәжіліс спикері қызметінен кетті. Ол бұл лауазымды 2012-2014 және 2016-2022 жылдары атқарды. Бұған дейін Президент әкімшілігін басқарған және Қарағанды облысының әкімі болған.
Ерлан Нығматулин – оның егіз бауыры, Мәжіліс және Сенат депутаты болған.
Арғын Нығматулин – олардың үлкен ағасы, Қарағанды облыстық мәслихатының бұрынғы депутаты.
Нығматулиндер рейдерлік, қылмыстық құрылымдарға қатысты болғаны, жалған құжаттар жасағаны үшін іс қозғалған.
Сурет: kursiv.media
