Іздеуде болған Тимур Сәдуақасов Өзбекстаннан ел аумағына жеткізілді. Бұл жөнінде Қаржылық мониторинг агенттігі хабарлады.
Ол аса ірі көлемде алаяқтық жасағаны және лауазымды тұлғаларға пара беруге итермелегені үшін күдікке ілінген.
Істің мән-жайы
2023 жылы шілде айында Сәдуақасов пен адвокат Құрманбаев өздерінің қызметтік байланыстарын пайдаланып, Долгалевтің іскерлік серіктестеріне қатысты сотқа дейінгі тергеу бастау мәселесін шешуді ұсынған.
Аталған мәселені шешу үшін Сәдуақасов пен Құрманбаевқа заңсыз сыйақы ретінде 225 млн теңге беру жөнінде келісім жасалған.
Алайда күдіктілер параның алғашқы бөлігі – 90 млн теңгені алғаннан кейін бұл қаражатты өз пайдасына жаратқан және өз міндеттерін орындамаған.
Кейін Сәдуақасов қылмыстық жауапкершілікке тартылудан қауіптеніп, соттан жасырынған.
Ол мемлекеттік шекараны заңсыз кесіп өтіп, Өзбекстан Республикасында ұсталды. Соған байланысты күдіктіге қатысты шекараны заңсыз кесіп өткені үшін қылмыстық іс қозғалған.
Тергеу абақтысына қамалды
«2025 жылы 25 ақпанда Түркістан облысындағы «Қапланбек» шекара бақылау-өткізу пунктінде ол Қаржылық мониторинг агенттігінің қызметкерлеріне тапсырылып, кейін Шымкент қаласындағы тергеу изоляторына қамалды. Жақын арада Сәдуақасов Павлодар қаласындағы тергеу изоляторына жеткізіледі. Аталған іс Павлодар облысының мамандандырылған ауданаралық қылмыстық сотында қаралады», — деп мәлімдеді Қаржылық мониторинг агенттігінің баспасөз қызметі.
Айтып өтелік, Тимур Сәдуақасов 2019 жылы 18 ақпанда Ақтау қаласы әкімінің орынбасары болып тағайындалған еді.
Сурет: видеодан скриншот/Қаржылық мониторинг агенттігі
