Елімізде әлі күнге дейін ауыз су келмеген елді мекендер бар. 26 ақпанда Мәжіліс депутаты Мархабат Жайымбетов Су ресурстары және ирригация министрлігін сынға алды. Осы министрлікке қарасты «байырғы жобалардың жыры бітпей келеді» деді ол.
Депутат Ұлытау облысындағы Есқұла топтық су құбырының құрылысы 2008 жылдан бері аяқталмағанын айтты.
«Ұлытау облысының орталығын сапалы ауыз сумен қамтамасыз ету мақсатында 2008 жылы Есқұла топтық су құбырының құрылысы жоспарланып, 2013 жылы аяқталуы тиіс болатын. Алайда, құрылыс 17 жылдан бері созылып, әлі күнге дейін толық аяқталмаған. Алайда әлі аяқталған жоқ», — деді депутат.
Депутаттың айтуынша, халық қазір тұтынып отырған ауыз судың санитарлық-эпидемиологиялық жағдайына жиі шағымданады. Одан бөлек жобалар жылдан жылға созылған сайын, құны да қымбаттай беретінін айтады.
«Қызылорда облысының Ақбасты, Тоқабай және Абай ауылдарын ауыз сумен қамтамасыз ету мақсатында 11 жыл бұрын басталған «Талап» топтық су құбырынфң жобасы әлі аяқталған жоқ. Тоқабайдағы жобаның бастапқы құны 3 миллиард теңгеден басталып, 9 миллиард теңгеге дейін өсті», —дейді.
Мархабат Жайымбетов Президент Тоқаевтың 2025 жылы Қазақстан халқын 100% таза ауыз сумен қамту жоспары орындалатынына күмәнданады. Себебі Солтүстік Қазақстан облысындағы Соколов топтық су құбырын реконструкциялау жобасы 2018 жылы басталып, әлі күнге дейін аяқталмаған. Жоспар бойынша, жоба 2026 жылы толықтай аяқталады деп айтылған. Бұл жобаны жүзеге асыруға миллиардтаған қаражат бөлінген.
2025 жылдың ақпан айында «Қазақмыс» корпорациясы Ұлытау облысындағы Кеңгір су қоймасын мемлекет меншігіне қайтарған еді.
Жезқазған тұрғындары суды Кеңгір ашық су қоймасынан ішіп отыр. Арнайы гидроцех ескі технологиясы арқылы тазартылғанымен, оның сапасы төмен дейді тұтынушылар.
ҚР Су ресурстары және ирригация министрлігі 2023 жылдың қазан айында 2025 жылға қарай 41 ауылды сапалы ауыз сумен қамтамасыз ететінін айтқан еді.
Сурет: Ашық дереккөздерден
