Жезқазғандағы мұнай базасының бірінде жарылыс болды. ТЖМ мәліметінше, арнайы мақсаттағы 3 автокөлік өрттеніп, 4 қызметкер жарақат алған.
Өрт сөндіру қызметкерлері келгенге дейін газ-ауа қоспасы жарылып, ангардың қабырғалары қираған. ТЖМ хабарламасында өрт салдарынан мұнай базасының 4 қызметкері ауруханаға жатқызылғаны айтылған.
«Жедел штаб жанармайы бар резервуарды салқындату арқылы қорғау үшін есептеулердің бірін жіберу туралы стратегиялық шешім қабылдады», – деп көрсетілген хабарламада.
Өрт сөндірушілер өртке жақын тұрған гидранттарға су құйылған машиналарды қойып, арнайы көбік шашып, 100 шаршты метр алаңдағы өртті сөндірген.
Өндіріс орындарында 202 адам мерт болды
Еңбек және халықты әлеуметтік қорғау министрлігі мемлекеттік еңбек инспекциясы комитетінің мәліметіне сәйкес, 2024 жылы елдегі кәсіпорындарда 1408 адам зардап шексе, 202 адам мерт болған.
Бұл көрсеткіштер 2023 жылмен салыстырғанда азайды дейді министрлік.
Зардап шеккендердің ең көп саны тау-кен металлургия кешені кәсіпорындары – 18,3% мен құрылыс саласында – 10,1% тіркелген.
Өндірістегі жарақат алудың негізгі себептері ретінде жұмыстың тиісті деңгейде ұйымдастырылмауы – 35,5%, жәбірленушінің қателік жіберуі – 31%, жол қозғалысы ережелерінің бұзылуы – 8,2%, еңбек қауіпсіздігі және еңбекті қорғау ережелерінің сақталмауы – 7,6% көрсетілген.
Қарағанды облысында көп факт тіркеледі
Қазақстанда өндірістік жарақаттану деңгейі соңғы жылдары азайғанымен, кейбір аймақтарда әлі де жоғары деңгейде қалып отыр. 2024 жылы Қарағанды облысында – 159 адам, Шығыс Қазақстан облысында – 124 адам, Павлодар облысында – 112 адам, Абай облысында – 101 адам, Қостанай облысында – 91 адам, Алматы қаласында – 116 адам өндірістік жарақат алған.
Сурет: ТЖМ видео скрині
