2025 жылдың 1 қаңтарынан бастап Ресейде мигранттарға қатысты жаңа ережелер жұмыс істейді. Бұл өзгерістер мигранттардың құқықтық мәртебесін реттеп, еңбек мигранттары үшін қосымша шектеулерді ұсынады.
Орта Азия елдерінен келген еңбек мигранттары үшін ереже қатаңдады. Бұған дейін шетел азаматтары елде рұқсат құжаттарынсыз 180 күнге дейін болса, жаңа ережелерге сәйкес бұл мерзім 90 күнге қысқарады.
2025 жылдың 5 ақпанынан бастап заңсыз жүрген шетел азаматтары үшін «қоныс аудару режимі» енгізіледі. Егер шетел азаматы заң бұзған жағдайда, құжаттарында қате болған кезде «бақылаудағы тұлғалар тізіміне» енеді.
Бұл тізімге енген жағдайда тұлғаға тұрғылықты жерін рұқсатсыз өзгертуге, тұрып жатқан өңірден шығуға, көлік жүргізуге, жүргізуші куәлігін алуға, некеге тұруға, кәсіпкерлік қызметті тіркеуге, мүлік сатып алуға және кейбір банк операциясын орындауға тыйым салынады.
Осы талаптарды орындамаған немесе бірнеше рет заң бұзған мигранттарды депортациялауы немесе сот шешімінсіз арнайы оқшаулау орталығына орналастыруы мүмкін.
Мигранттар табысы жоғары салаларда жұмыс істей алмайды
2024 жылдың тамызында Ресей депутаттары мигранттардың белгілі бір салаларда жұмыс істеуіне тыйым салуды ұсынды. Олар — білім беру, медицина, жолаушылар тасымалы, тамақ жеткізу сияқты табысы жоғары салаларды қамтиды.
2025 жылдан бастап патентпен жұмыс істейтін мигранттарға мектепке дейінгі мекемелерде жұмыс істеуге тыйым салынады. Сонымен қатар, мигранттардың такси жүргізушісі болып жұмыс істеуіне, алкоголь және темекі өнімдерін сатуға тыйым салынған.
Сурет: inbusiness.kz
