Халықтың БЖЗҚ-дан қаражат алу белсенділігі тағы да артты. Негізгі себептің бірі – зейнетақы жүйесіне байланысты жаңалықтар мен ықтимал реформалар туралы талқылаулардың қайта күшеюі. Бұл деректі Data HUB аналитикалық арнасы хабарлады.
Елде тұрғын үй жағдайын жақсарту үшін қараша айында 56,6 мың өтініш қабылданып, 46,3 миллиард теңге берілген. Бұл қазан айына қарағанда шамамен 25%-ға артық.
Ал емделу үшін қаражатқа өтініш бергендер сандары 20,8 мың, нәтижесінде 20,5 миллиард теңге бөлінген. Өтініш саны қазанға қарағанда 58%-ға, ал берілген қаражат көлемі 55%-ға артты.
Неліктен белсенділік өсті?
“Тұрғын үй мен емделу мақсатында қаражат алу шілдеден бастап белсенді жүре бастады. Дәл сол уақытта болашақта зейнетақы қорынан қаражат алуға шектеу қою мүмкіндігі туралы қоғамдық талқылау басталған еді. Сол кезде шілдедегі көрсеткіштер – өтініштер саны да, қаражат көлемі де – жылдың алғашқы жартысындағы орташа көрсеткіштерден екі есеге жоғары болды” — делінген хабарламада.
Ал қараша айындағы белсенілікті авторлар былай түсіндіреді:
“Зейнетақы жүйесіне өзгеріс енгізу туралы тағы да мәлімдемелер болды. Еңбек министрі Светлана Жақыпованың ұсынысы қоғамда талқылау туғызды. Ұсыныстың мәні – жұмыс істеп жүрген зейнеткерлерге мемлекеттік төлемдерді тоқтата тұру арқылы, бұл қаражатты ерте зейнетке шыққысы келетіндерге бағыттау” — делінген.
Кейіннен министр Светлана Жақыпова бастапқыда мемлекеттік төлемдерді тоқтату туралы идеяны ұсынғанымен, бұл тек талқылау деңгейінде екенін айтты.
Нәтижесінде, жаңа реформалар туралы жаңалықтар халықты «қазір алып үлгеру керек» деген ойға итермеледі. Бұл әсіресе емделу мақсатындағы өтініштердің күрт өсуіне әкелді. Тұрғын үй үшін қаражат алуға да сұраныс азаймай отыр.
Сурет: gov.kz
