Қазақстан Прьемер-лигасында ойнайтын Ақтау қаласының «Каспий» футбол клубы оқу-жаттығу жиындарына бөлінген 27 млн теңгеден астам қаражатты жымқырған. Бұл туралы Маңғыстау облысының прокуратурасы хабарлады.
Клубтың бұрынғы басшысы екі танысымен бірігіп, күш қолдану арқылы клубтың өзге қызметкерлерін айғақтарды өзгертуге мәжбүрлеген. Оған қоса, 15 млн теңге қорқытып алуға әрекет жасаған. Облыстағы сыбайлас жемқорлыққа қарсы қызмет пен Ұлттық қауіпсіздік комитеті бірлесіп осы фактіні тергеу барысында анықтаған.
3 желтоқсан футбол клубының экс-басшысын, «К» және «О» азаматтарын қамауға алуға санкция берілді. Басқа мәліметтер әзірге тергеу мүддесі үшін жария етілмейтінін мәлімдеді прокуратура.
Сыбайлас жемқорлыққа қарсы іс-қимыл агенттігі жыл басынан бері спорт саласында 39 жемқорлық қылмысын тіркеді. Агенттіктің хабарлауынша, спорттық ұйымдар спорт кешендері мен футбол академияларын салудың орнына легионерлерді ұстауға көп ақша жұмсаған деп мәлімдейді. Мысалы, ең қымбат «Астана» ФК-да (2018-2023 жылдары 50 млрд теңге, құрылтайшысы – Спорт және дене шынықтыру істері комитетінің «Қазспортинвест» АҚ «Туризм және спорт индустриясын қолдау қоры» корпоративтік қоры және ҰОК) өзінің футбол академиясы мен инфрақұрылымы жоқ. 6 жыл ішінде (2018-2023 жылдары) клуб футбол алаңдары мен үй-жайларды жалға алуға 1,4 млрд теңге жұмсаған.
Өзге футбол клубтарындағы заң бұзушылықтар
2024 жылы 20 тамызда Талдықорған қалалық соты «Жетісу» футбол клубының спорт директоры Д. М. Иманқұловты 5,5 млн теңгені алаяқтық жолмен жымқырғаны үшін кінәлі деп тауып, 3 жыл 6 ай бас бостандығынан айырды. Сот үкімі заңды күшіне енген жоқ.
Батыс Қазақстан облысындағы жалғыз кәсіби футбол клубы – «Ақжайық». Футбол клубы үшін 2024 жылы мемлекет 400 миллион теңге бөлген еді, алайда ол қаражатты су тасқынының шығындарын жабуға бағыттады, нәтижесінде клуб мемлекеттік қаржыландырусыз қалды. 2024 жылы ақпан айында стадион басшысы Оралбай Жақсымбетов 57 миллион теңгені жымқырды деген күдікпен қамауға алынды.
Сурет: kpl.kz
