Бүгін, 15 қазан күні ауыл шаруашылығы еңбеккерлерінің бірінші форумы өтті. Осы форумда ҚР Президенті Қасым-Жомарт Тоқаев шаруашылық саласынан бөлек, басқа да бірнеше мәселені қозғады.
Тоқаев мектеп асханаларындағы азық-түлік қауіпсіздігін күшейту керек екенін айтты. Биыл Маңғыстау облысында жүздеген оқушы жаппай уланып қалды. Президент осы оқиғадан сабақ алу керек екенін ескертті.
«Мұндай жағдайлардың қайталануына жол бермеу керек. Санитарлық-эпидемиологиялық нормалардың сақталуын қатаң бақылау қажет. Бірақ мәселенің мәні тым тереңде жатыр. Оқушыларды сапасы күмәнді әрі арзан азық-түлікпен тамақтандыра алмаймыз. Балаларды тамақтандырудың халықаралық стандарттарына ұмтылғанымыз дұрыс», – деді Тоқаев.
Сонымен қатар жақында ғана үшінші кезеңі аяқталған декларация науқанына қатысты пікір айтты. Президенттің сөзінше, халықты декларация тапсыруға міндеттеу орынсыз.
«Алайда бір мәселені ескеру қажет. Жаппай декларация тапсыру тұжырымдамасы осыдан 14 жыл бұрын қабылданған. Содан бері елімізде цифрландыру ісі және финтех саласы қарқынды дамып келе жатыр. Түрлі мемлекеттік мекемелерге ортақ мәліметтер базасы пайда болды. Қаржы және салық бақылауы күшейді. Демек осындай ауқымды өзгерістерден кейін төртінші, яғни, соңғы кезеңде азаматтарды декларация тапсыруға міндеттеу қаншалықты орынды деген сұрақ туады. Үкімет бұл мәселені жан-жақты пысықтауы қажет», – деді Тоқаев.
Президент ауыл-аймақты дамытудың маңызы жөнінде айтты. Мемлекеттен берілетін субсидияларды қысқартып, ауыл шаруашылығы нысандарына банктер жеңілдетілген несие беру керектігін атап өтті:
«Қазақстан халқына арнаған Жолдауымда салаға жеке инвестициялар тарту керек екенін айтқан едім. Агроөнеркәсіп кешенін мемлекет тарапынан субсидиялауды біртіндеп қысқартып, оның орнына банктердің ауыл шаруашылығына жеңілдетілген несие беруін ынталандырған жөн. Отандық қаржы институттары агрокәсіпорындарға ұзақмерзімді әрі қолжетімді қаражат ұсынуға тиіс».
Тоқаев мемлекеттік қызметшілерге сыйақыны қысқарту мәселесіне де тоқталған. Мемқызметшілердің табысы айтарлықтай көп емес екенін, шенеуніктерге сыйақы беруге тыйым салудың негізі жоқ екенін айтты.
«Мемлекеттік қызметшілер – елдегі жүйелі өзгерістердің басты жолбасшылары. Олардың табысы айтарлықтай көп емес. Кей кездері түнімен жұмыста отырады. Мемлекеттік қызметшілердің де отбасы мен міндеті, қала берді қарапайым адам ретіндегі қалауы мен жоспары бар. Мемлекеттік органдардың тиімділігін арттыру үшін қатардағы қызметкерлердің еңбекақысы бәсекеге қабілетті болуы керек деп ойлаймын. Сыйақы аталған мәселені шешуге мүмкіндік береді», – деді мемлекет басшысы.
Сурет: Ақорда
