Бүгін Мәжіліс отырысында Қазақстанда телефон нөмірлерін eGov арқылы беру туралы ұсыныс айтылды. Сол кезде алаяқтықтардың әрекетіне тосқауыл қою тиімді болмақ.
ҚР Цифрлық даму, инновациялар және аэроғарыш өнеркәсібі вице-министрі Асхат Оразбек министрлік SIM-карталарды сатуда тиісті шектеу енгізу жоспарлап отырғанын айтты.
«Қазір алаяқтар әлеуметтік желілерде жұмыс істейді. Көбіне WhatsApp желісін қолданады. Сондықтан біз ұялы нөмірлер жоспарын мемлекетке қайтару үшін заңнамалық бастама көтереміз. Нөмірлік жоспарды мемлекетке қайтарамыз және азаматтар электронды үкімет порталында немесе eGov mobile арқылы ұялы телефон немесе қалалық байланыс нөмірін алады. Сонымен қатар бір адам алатын SIM-карталар санын шектейміз. Ал енді коммерциялық мақсатта SIM-карталарды бақылаусыз алатын заңды тұлғалар әр нөмірді пайдалану мақсатын негіздеуі керек болады. Алдағы уақытта осындай бастамалармен сіздерге келеміз», — деді ресми өкіл.
Бұл интернет алаяқтық қылмыстардың алдын алу үшін қабылданғалы отыр. Себебі қазақстандық нөмір арқылы айлаларын іске асырып жүргендер көбейген.
Ішкі істер министрлігінің дерегінше, елде қолға түскен үш қылмыстық топтан 3 500-ден астам SIM-карта тәркіленген.
Айтып өтелік, 2019 жылы ұялы операторлар абоненттерінің мәліметтер базасына жүргізілген статистикада қазақстандықтардың 42 млн SIM-карта сатып алғаны белгілі болған. Бұл сол кезде 18 млн халқы болған елдің әрбір адамында 2-3 телефон нөмірінің бар екенін көрсетеді.
Сурет: freepik.com
