Елге 177 млрд теңге көлемінде қаражат қайтарылды. Бас прокуратураның мәліметінше, Қазақстанға тізілім субъектілерімен жасалған келісімдердің нәтижесінде шамамен 147 млрд теңге, процестік келісімдер бойынша 19 млрд теңге, активтерді өткізуден 6 млрд теңгеден астам, соттардың шешімдері бойынша шамамен 5 млрд теңге және жылжымайтын мүлікті жалға беруден 165 млн теңгеден астам қаражат түскен.
«Өткізілген активтердің ішінде екі вилла, әкімшілік ғимарат, тұрғын үй, пәтер, жер учаскесі және екі сәнді автокөлік бар. Активтерді табысты өткізудің бір мысалы болып Алматы қаласындағы жер учаскесі саналады. Ол «Заңсыз иемденілген активтерді мемлекетке қайтару туралы» Заң субъектісінен 176 млн теңге бағамен қабылданып, 657 млн теңгеге, яғни бастапқы бағалау құнынан төрт есе артық сатылған. Сонымен қатар тізілім субъектілерімен келісімдер бойынша арнаулы мемлекеттік қорды 150 млрд теңгеден астам сомаға ақшалай қосымша толықтыру күтіліп отыр», — делінген Прокуратураның хабарламасында.
Барлық қайтарылған қаражат елде әлеуметтік және экономикалық жобаларды іске асыру үшін пайдаланылмақ.
Жалпы 2022 жылдан бері елге 1,5 трлн теңге көлемінде активтер қайтарылған. Оның ішінде қылмыстық, азаматтық, әкімшілік істер бойынша өндірілген сомалар мен мүліктер бар.
Айтып өтейік, былтыр Қайтарылған активтерді басқару жөніндегі компания құрылды.
Сонымен қатар «Заңсыз иемденілген активтерді мемлекетке қайтару туралы» Заңды іске асыруға қажетті заңнамалық база қабылданып, арнайы шот – арнаулы мемлекеттік қор ашылды.
Сурет: kursiv.media
