Көктемгі су тасқынынан зардап шеккен 615 кәсіпкерге 10,1 млрд теңге өтемақы төленді.
Ұлттық экономика министрлігінің ресми мәліметінше, су тасқыны салдарынан шағын және орта кәсіпкерлік субъектілеріне (ШОК) келтірілген мүліктік шығындарды өтеу қағидалары шеңберінде жергілікті атқарушы органдар ШОК субъектілерінің залалды өтеу туралы өтінімдерін қабылдау және қарау бойынша жұмыс жүргізіп жатыр.
Үкімет резервінен кәсіпкерлердің шығындарын өтеу үшін 12,1 млрд теңге сомасында қаражат бөлінді.
«1 қазандағы жағдай бойынша ШОК субъектілерінен 15 млрд теңге сомасына 764 өтінім түсті. Шамамен 12 млрд теңге сомаға 630 өтінім бойынша оң шешім қабылданды. Оның ішінде 10,1 млрд теңгеден астам сомаға 615 өтінім (өтінімдердің жалпы санының 80,4%-ы) бойынша төлемдер толық көлемде жүргізілді», — делінген ҰЭМ хабарламасында.
30 кәсіпкердің өтемақыға қатысты өтініші кері қайтарылған. Қалған зардап шеккен объектілер бойынша бағалау және сметалық жұмыс жалғасып жатыр. Бағалау аяқталғаннан кейін өтінімдер өңірлік комиссиялардың қарауына шығарылады.
Өтемақыға өтініш негізінен Атырау (423 өтінім) және Солтүстік Қазақстан (107 өтінім) облысы кәсіпкерлерінен түскен. Сондай-ақ Батыс Қазақстан облысынан – 87, Қостанай облысынан – 68, Ақтөбе облысынан – 51, Ақмола облысынан – 28 өтінім түскен.
Елде көктемгі тасқынның шығыны әлі де есептеліп жатыр.
«Алдын ала есептеулерге сүйенсек, су тасқынынан келген шығын 300 млрд теңгеден асады. Бұл нақты сан емес. Әлі бөгеттер, жолдар, құбырлар қалпына келіп жатыр. Содан кейін нақты есепті береміз», — деген еді Премьер-министрдің орынбасары Қанат Бозымбаев.
Сурет: freepik.com
