Ішкі істер министрлігі Ұлытау облысында қылмыстық топтардың құрықталғанын хабарлады.
– Ұйымдасқан қылмысқа қарсы күрес бөлінісінің қызметкерлері «Қазақмыс корпорациясы» ЖШС қауіпсіздік қызметімен бірлесіп, қымбат металл қорытпаларын ұрлауды жолға қойған қылмыстық топ әрекетінің жолын кесті. Топқа аталған кәсіпорынның қызметкерлері де кірген. Күдіктілер кәсіпорыннан 6,5 млн теңге өнімін ұрлау кезінде ұсталды. Қазіргі уақытта олардың басқа қылмыстарға қатысы бар-жоғы тексеріліп жатыр», – деп хабарлады Ішкі істер министрлігінен.
Сондай-ақ полиция 2022 жылдың наурыз айында жергілікті кәсіпкерден 20 млн теңге бопсалаған тағы бір топ мүшелерін ұстады. Жәбірленушіні жалдамалы пәтерге алдап алып келіп, физикалық күш қолданып, қару-жарақпен қорқыту арқылы ақша талап еткен.
«Сонымен қатар 2018 жылы болған жергілікті тұрғынды өлтіруге оқталу әрекеті әшкереленді. Жергілікті криминалитеттен құралған қылмыстық топ анықталды. Оған қатысушылар қазіргі уақытта басқа қылмыстар жасағаны үшін жазасын өтеп жатыр. Кісі өлтіруге оқталу әрекеті жасалған тапанша тәркіленді.
Көрсетілген фактілер бойынша барлығы 17 адам ұсталып, ішкі істер органдарына жеткізілді. 20-дан астам тінту шаралары өткізілді, нәтижесінде бес атыс қаруы, оқ-дәрілер, пышақтар және экстремистік сипаттағы діни әдебиеттер тәркіленді. Барлық факті бойынша сотқа дейінгі тергеу жүргізіліп жатыр. Өңірлерде қылмыстық топтардың қызметіне жол бермеу жұмысы жалғасып жатыр», – деді ІІМ ұйымдасқан қылмысқа қарсы күрес департаментінің басқарма бастығы Қуандық Алпыс.
Еске салсақ, көктемде «Қазақмыс» компаниясының бөлім басшысы ұсталған еді. Оған Қарағанды облысында қылмыстық құқық бұзушылық жасады деген күдікпен тергеу жүргізілген.
Сондай-ақ жазда «Қазақмыстан» металл және тауар ұрлаумен айналысқан қылмыстық топ құрықталды. ІІМ-нің ресми мәліметінде жергілікті криминалитеттен басқа қылмыстық әрекетке кәсіпорын қызметкерлері, оның ішінде қауіпсіздік қызметінің басшылары мен қызметкерлерінің қатысы бар болуы мүмкін екендігі айтылды.
«Қазақмыс» корпорациясы — Қазақстанның алдыңғы қатарлы тау-кен және металлургия компаниясы. Компаниясының иелері – кәсіпкерлер Владимир Ким мен Эдуард Огай. Олар «Kazakhmys Copper» АҚ арқылы «Қазақмыс корпорациясының» 69,37% және 29,73% үлесіне иелік етеді.
Компанияның құрамында 10 кеніш, бес тау-кен байыту фабрикасы, екі мыс балқыту зауыты, екі көмір разрезі бар.