Қазақстанда 2030 жылға қарай мұнай өндірісі 100 млн тоннаға жеткізіледі. Бұл жөнінде Алматыда өтіп жатқан KIOGE конференциясында Энергетика министрі Алмасадам Сәтқалиев айтты.
Министрдің сөзіне сүйенсек, 2023 жылы Қазақстанның мұнай өндіруі 90 миллион тоннаға жетті. Ал жылы мұнай экспорты 70,5 миллион тоннаны құрады.
«Қазіргі мақсат – 2030 жылға қарай мұнай өндіруді жылына 100 миллион тоннаға (шамамен 730 миллион баррель) жеткізу. Табиғи газ өндіруге келетін болсақ, 2023 жылы бұл көрсеткіш 59,1 миллиард текше метрге жетсе, 2030 жылға қарай 90,7 миллиард текшеге арттыру көзделіп отыр», – дейді Алмасадам Сәтқалиев.
Қазақстан әлемдегі ең ірі мұнай мен газ өндіруші және экспорттаушы елдердің бірі.
Биылғы төрт ай қорытындысында мұнай-газ-химия өнімдерін өндіру көлемі өткен жылмен салыстырғанда екі есеге өсіп, 213,1 мың тоннаны құраған. Саланың барлық өнімдері бойынша өсім байқалады.
Сондай-ақ салада 2029 жылға дейін шамамен $14,3 млрд-қа бес ірі жобаны іске асыру жоспарланған. Аталған жобаларды іске асыру экономиканың жыл сайынғы өсімін 1,5%-ға жеткізіп, 20 мыңға жуық жұмыс орнын, оның ішінде құрылыс кезеңінде 17 мың және пайдалану кезеңінде 3 мың жұмыс орнын ашуға мүмкіндік береді.
Осы жылдың өзінде қуаты 340 мың тоннаға дейін бутадиенді және оның туындыларын өндіру жөніндегі жобаның құрылысы басталады.
Сурет: freepik.com
