Бүгін Сенат мопедтерді тіркеу мен көлік жылдамдығын бақылауға арналған жаңа заңды мақұлдады.
ҚР Парламентінің депутаттары бастамашылық жасаған заңның мақсаты – жолдағы көлік қозғалысын ұйымдастыру мәселелері бойынша заңнаманы одан әрі жетілдіру.
Енді Қазақстанда мопедтер мемлекеттік тіркеуден өтіп, ал оның иелері жүргізуші куәлігін алуға міндеттеледі.
Құжатқа сәйкес, қозғалтқыш көлемі 50 текше сантиметрден аспайтын не электр қозғалтқышы бар және максималды жобалық жылдамдығы сағатына 50 километрден аспайтын мопедтер тіркелетін болады.
Мопедті басқару құқығы «А1» кіші санатындағы жүргізуші куәлігімен расталады, сонымен бірге «А» және «В» санаттары бар азаматтар да мопед басқаруға құқылы.
Сондай-ақ көлік құралдарына техникалық байқауды жүргізетін ұйымдарға қойылатын талаптар да қайта қаралды.
Тиісті норма заң қабылданған кезден бастап алты ай өткен соң қолданысқа енгізіледі.
Биылғы сегіз айда мопед кесірінен 48 адам көз жұмды
Қазақстанда қазір 80 мыңнан аса мопед бар. Бұл жөнінде Сенаттың жалпы отырысында жол қауіпсіздігін цифрландыру мәселелеріне арналған заңды бірінші оқылымда талқылау кезінде Ішкі істер министрінің орынбасары Игорь Лепеха айтты.
«Қазір «Сергек» және басқа да бейнебақылау камералары арқылы мопед жүргізушілерінің кім екенін анықтау қиын. Мопедте мемлекеттік тіркеу нөмірі жоқ. Осыны пайдаланып, олар әдейі жол ережесін бұзады. Ішкі істер министрлігі дерегіне сүйенсек, елде 80 мыңнан аса мопед бар. Қазір оларды тіркеу міндетті емес. Былтыр 12 айда мопедтердің қатысуымен 750 көлік апаты тіркеліп, 39 адам қаза тапты. Сонымен бірге 730 адам жараланды», — деді ол.
Ішкі істер министрі орынбасарының айтуынша, биыл сегіз ай ішінде мопедтердің қатысуымен 962 көлік апаты тіркелген. Салдарынан 48 адам көз жұмып, 1 024 адам жараланды.
Сурет: pixabay.com
