Бүгін ҚР Бас прокуратурасы және Ішкі істер министрлігінің Интерпол қызметкерлерiмен, Қазақстанның Түркиядағы Елшілігінің қолдауымен қылмыстық жауапкершілікке тарту мақсатында Түркия Республикасынан ел азаматы экстрадицияланды.
Бас прокуратураның хабарлауынша, күдікті 2022-2023 жылдар аралығында Алматы қаласындағы коммерциялық ұйымның есепшісі бола отырып, төлем тапсырмаларына жалған мәліметтер енгізу арқылы өзіне сеніп тапсырылған 27 миллион теңгеге жуық қаражатты заңсыз иемденген.
«Қылмыс жасағаннан кейін күдікті жасырынған. Осыған байланысты оған халықаралық іздеу жарияланды. Биыл тамызда ол Түркия аумағында ұсталып, содан кейін Қазақстан Бас прокуратурасының сұрауы бойынша қазақстандық құқық қорғау органдарына берілді. Қазіргі уақытта аталған адам Астана қаласының тергеу изоляторына қамалды», деп мәлімдеді прокуратурадан.
Күдіктінің қылмысты жасағаны үшін мүлкі тәркіленіп, жеті жылдан он екі жылға дейінгі мерзімге бас бостандығынан айыру жазасы қарастырылған.
Айтып өтелік, жылдың басында Бас прокуратура мыңнан аса адамның халықаралық іздеуде екенін мәлімдеген.
Былтыр Қазақстанға іздеуде жүрген 55 адам Болгария, Грузия, Қырғыз Республикасы, Ресей, Сербия, Түркия, Украина және басқа да елдерден қайтарылған.
Ведомствоға сәйкес бүгінде 823 адамға мемлекетаралық іздеу жарияланған. Сонымен қатар прокуратура 1 543 адамның халықаралық іздеуде жүргенін айтқан.
Сурет: видеодан скрин
