Астана қаласы «Мәдениет басқармасы» ММ-нің бұрынғы басшысы мен мердігер ұйым өкілдеріне қатысты аса ірі көлемде бюджет қаражатын жымқыру фактісі бойынша Қаржылық мониторинг агенттігі сотқа дейінгі тергеу амалдарын жүргізіп жатыр.
2016 жылы Астана күні мерекесіне орай салынған «Күн» (Есіл өзеніндегі жарық-иллюминациялық және от шоуы) субұрқағының құрылысы кезінде мемлекеттік сатып алу рәсімі жүргізілмей тікелей келісімшарт жасалған.
Сурет: yandex.com
Субұрқақ жобалық құжаттамасыз және мемлекеттік сараптамадан өтпей салынған.
Құрылыс барысында техникалық сипаттамаларға сәйкес келмейтін сапасыз материалдар қолданылған.
Нәтижесінде аталған нысан 2017 жылдан бастап жұмыс істемей, қазіргі таңда апатты жағдайда тұр.
Ұрланған қаражаттың көлемі 1 млрд теңгеден асып отыр.
ҚР ҚМА ресми өкілінің хабарлауынша, күдікті Астана қаласы мәдениет басқармасының бұрынғы басшысы ұсталып, уақытша ұстау изоляторына қамалды.
Сурет: видеодан скрин / ҚР ҚМА
Тергеу аясында оның мүлкіне тыйым салынды. Оның ішінде 3 коммерциялық нысан, 2 автотұрақ орны және Астана қаласындағы премиум санаттағы пәтер бар.
Аталған іс бойынша күдіктілерге тиесілі 572 миллион теңгенің мүлкіне шектеу қойылды.
ҚР ҚПК 201-бабына сәйкес, сотқа дейінгі тергеп-тексеру деректері жарияланбайды.
Қоса өтсек, Астана қаласының Мәдениет, мұрағат және құжаттама басқармасын 2010-2019 жылдары Болат Мажағұлов басқарған.
Биыл қыста Астана әкімі Жеңіс Қасымбек елордада 2016 жылы қала күніне орай салынған бірегей «Күн» субұрқағын бұзып жатқандарын хабарлаған еді.
