Маңғыстау облысының Бесшоқы ауылында балалардың улануынан кейін республикадағы барлық мектептің асханасында санитариялық-эпидемиологиялық талаптардың сақталуына мониторинг жүргізіледі.
Алғашында Маңғыстаудың Мұнайлы ауданында №8 мектептің оқушылары іш ауруы мен дене қызуына шағымданып, дәрігердің көмегіне жүгінген. Кейін алпысқа жуық оқушының астан уланғаны анықталды.
Аталған жағдайға байланысты құзырлы орган өкілдерімен бірлескен арнайы штаб құрылды. Денсаулық сақтау министрі Ақмарал Әлназарова жағдайды бақылауда ұстап отырғанын айтты. Оқиғаға қатысты қылмыстық іс қозғалып, сотқа дейінгі тергеп-тексеру басталды.
Кейін Маңғыстау облыстық денсаулық сақтау басқармасы 67 баланың медициналық көмекке жүгінгенін хабарлады.
Қазір 460 бала дәрігерлердің бақылауында, оның 83-і ауруханаға жатқызылды, екі бала жансақтау бөлімінде. Зардап шеккендердің барлығы, оның ішінде жансақтау бөліміндегі балалардың жағдайы тұрақты.
Бүгін Үкімет басшысы Бесшоқы ауылында балалардың улануына байланысты денсаулық сақтау, оқу-ағарту министрлерін, Маңғыстау облысы әкімінің есебін тыңдады.
«Бір ай ішінде республикадағы барлық мектептің асханасында санитариялық-эпидемиологиялық талаптардың сақталуына мониторинг жүргізіледі. Ол мектептегі тамақтанудың қауіпсіздігін қамтамасыз ету және мұндай жағдайлардың қайталануына жол бермеу шараларын күшейтуге бағытталған», — деп хабарлады Үкіметтен.
Айта өтейік, оқиғаға байланысты тәулік бойы штаб жұмыс істеп тұр.
Сурет: freepik.com
