2026 жылы әлеумет және еңбек саласына арналған республикалық бюджет шығыстары 6 трлн 833 млрд теңгені құрап, өткен жылмен салыстырғанда 15,1%-ға өсті. Бұл туралы Еңбек және халықты әлеуметтік қорғау министрлігі хабарлады.
Аталған шығыстар 2025 жылмен салыстырғанда 897,7 млрд теңгеге артқан. Қаражаттың үлесі жалпы ішкі өнімге шаққанда 3,7%-ды, ал республикалық бюджеттегі үлесі 24,6%-ды құрайды.
Бөлінген қаражаттың 99,3%-ы немесе 6 трлн 783 млрд теңгесі әлеуметтік төлемдерге бағытталады. Оның ішінде 4 трлн 890 млрд теңге 2,6 млн зейнеткердің төлеміне, ал 1 трлн 893 млрд теңге шамамен 2,3 млн адамға арналған жәрдемақыларға қарастырылған.
Қазір республикалық бюджет есебінен әлеуметтік төлемдердің 41 түрі жүзеге асырылады. 2025 жылы бұл мақсатта 4,6 млн адамға 5 трлн 858 млрд теңге бөлінген.
