Украинаның дрон шабуылынан кейін Қазақстанда мұнай өндірісі желтоқсан айында шамамен 6%-ға қысқарды. Бұл туралы Reuters агенттігі хабарлады.
Дереккөздің айтуынша, 29 қарашада Каспий құбыр консорциумының Ресейдегі Қара теңіз жағалауында орналасқан «Южная Озереевка» мұнай терминалына жасалған дрон шабуылы Қазақстан мұнайының экспортына зақым келтірді.
Аталған терминал Қазақстан мұнай экспортының шамамен 80%-ын қамтамасыз етеді. Соның салдарынан 1-28 желтоқсан аралығында Қазақстанның мұнай және газ конденсаты өндірісі тәулігіне 1,93 млн баррельге дейін төмендеген.
Ал Каспий теңізінің солтүстік-шығыс жағалауындағы Теңіз кен орнында өндіріс 10%-ға қысқарып, тәулігіне 719,8 мың баррельді құрады.
Шабуылдан кейін CPC Blend маркалы мұнай экспорты соңғы 14 айдағы ең төменгі деңгейге түсті. Желтоқсан айында терминал арқылы Қазақстаннан экспорт көлемі қарашадағы орташа көрсеткішпен салыстырғанда 19%-ға азайып, тәулігіне 1,082 млн баррель жүктелді.
Экспорттың бір бөлігі Баку–Тбилиси–Жейхан құбырына бағытталды, ал Атырау–Самара бағытымен Ресей арқылы мұнай көлемі шамамен 25%-ға өсіп, тәулігіне 255,5 мың баррельге жетті.
Қазір терминал бір ғана айлақты қолданады, себебі екіншісі дрон шабуылынан кейін істен шыққан, ал үшіншісі техникалық қызмет көрсетуге байланысты уақытша істемейді.
фото: istockphoto.com
