Ақмола, Батыс Қазақстан, Абай және Ұлытау облыстарының әкімдеріне жылыту маусымына дайындықты жеделдету туралы ескерту жасалды. Бұл туралы Үкімет отырысында премьер-министр Олжас Бектенов хабарлады.
Премьердің сөзінше, аталмыш өңірлерде дайындық жұмыстары кешігіп жатыр.
«Жылыту маусымына дайындық жұмыстары келесі Үкімет отырысына дейін аяқталуы тиіс. Жылдамдату сапаға әсер етпеуі қажет. Талап орындалмаса, тиісті шешімге келеміз», — деді Бектенов.
Ол бұл талап барлық аймақтарға қатысты екенін атап өтті.
Естеріңізге сала кетейік, БҚО-да 2025 жылдың тамыз айынан бастап жылу тарифтері 2%-ға қымбаттады.
2024-2025 жылыту маусымында «Жайықжылуқуат» АҚ жеткілікті көлемде жылу өндіре алмаса да, тұрғындардан 3,4 млн теңге сомасында артық ақша алған. Сот шешімімен қаражатты қайтару үшін тұрғындарға 2025 жылдың қазан айындағы жылу бағасына жеңілдік ұсынылады.
Қазіргі таңда Қазақстандағы жылу электроне орталықтарының 61%-ы тозған. Бұл туралы энергетика министрі Ерлан Ақкенженов мәлімдеді.
фото: primeminister.kz
