Қазақстанның Сыртқы істер министрлігі әлеуметтік желілерде тараған министр Мұрат Нұртілеудің ұсталғаны жөніндегі хабарламаны жоққа шығарды. Бұл туралы министрліктің ресми өкілі Айбек Смадияров мәлімдеді.
Оның айтуынша, министрдің ұсталғаны туралы ақпарат шындыққа жанаспайды.
«Мұрат Нұртілеу ұсталды деген ақпарат шындыққа сәйкес келмейді. Бұл –журналистік этикаға және еліміздің қолданыстағы заңнамасына қайшы әрекет», – деді Айбек Смадияров.
Бұған дейін қазақстандық Orda басылымы құқық қорғау органдарындағы дереккөздерге сілтеме жасап, Мұрат Нұртілеудің ұсталғаны және оның үйінде тінту жүргізілгені туралы хабарлаған болатын.
«Көбіне расталмаған «хайп қуған» деректерге еремін деп, журналистер мұндай мәлімет азаматтарға және олардың жақын туыстарына зиян тигізуі, ар-намысы мен қадір-қасиетіне нұқсан келтіруі, жала болып шығуы мүмкін екенін есте ұстауы тиіс», – делінген постта.
фото: primeminister.kz
