Атырау мен Орал арасын байланыстыратын республикалық маңызы бар автожолдың 120 шақырымы жөндеуден өтеді. Бұл туралы «Орал апталығы» басылымы ақпарат жариялады.
Жоба құны – 8,3 миллиард теңге. Трассаны «Айдана» ЖШС жөндейді.
1991 жылы ашылған «Айдана» компаниясының негізін қалаушы – Аветик Амирханян. Ол 2021 жылы Қазақстан Республикасының Мәжіліс депутаты болып сайланды. 2020 жылдан бастап компанияны Аветик Амирханянның кіші ұлы Армен басқарады.
Орал—Атырау трассасының ұзындығы – 487 шақырым, оның 303 шақырымы Батыс Қазақстан облысының аумағында орналасқан.
Компания жолдың 372-шақырымынан 492-шақырымына дейінгі аралығында асфальттың үстіңгі қабатын қайта өңдеп, жаңа жабынды төсейді.
Тас жолда 2016 жылы 554 млн теңгеге 39 шақырым және 2017 жылы 1 млрд теңгеге 81 шақырым жол жөнделді.
Бастапқыда бұл жолды түбегейлі жаңғырту жоспарланған. Атырау мен БҚО арасындағы 303 шақырым жол төрт жолақты етіп кеңейту, екі жағына қоршау тұрғызу, жаяу жүргіншілер мен мал өтетін өткелдер салу көзделген. Жобаны әзірлеуге ұйым тартылып, құжаттамасы дайындалғанымен, қаржыландырудың болмауына байланысты бұл жоба кейінге шегерілді.
2024 жылдың сәуірінде Көлік вице-министрі Талғат Ластаев бұл жобаның сметасы әлі бекітілмегенін айтқан. Кейін «ҚазАвтоЖол» компаниясы реконструкцияның орнына тек орташа жөндеу жүргізілетінін хабарлады.
«Айдана» ЖШС Орал қаласы Зашаған кентінде салып жатқан жол сапасы халық наразылығын тудырды. Бұл мәселені заңгер әрі қоғам белсендісі Бауыржан Ахметжан әлеуметтік желілерде көтерді.
Заңгер мәліметі бойынша «Айдана» ЖШС Зашағандағы 38 көшеге асфальт төсеуі тиіс. Бұл үшін бюджеттен 1,2 млрд теңге бөлінген. «Жол активтерінің ұлттық сапа орталығы» РМК БҚО филиалының бөлім басшысы Дәурен Әміров мердігер құйған асфалтьбетон қоспасы нормативке сай емес екенін анықтаған.
Аталған ЖШС бұған дейін де талай мәрте жол сапасы жөнінен сынның астына қалды.
Тендерге қатысатын компаниялар өз нысандарындағы жол құрылысын уақтылы атқара алмайтынына мысал көп. БҚО мәслихатының депутаты О. Минасян басқаратын «Ануш құрылыс» ЖШС-ның Чапай—Жаңақала—Сайқын автожолын жөндеуге үлгермейтіні, бір өзі 11 нысан бойынша жол жөндеуді мойнына алғаны белгілі болды.
Сарапшылар мемлекеттік сатып алу конкурсының талаптарын қатаңдату керек деп есептейді.
фото: freepik.com
