«Депутат жол салу үшін депутатқа шағымдану керек пе?»
«Кеше Мәжіліс депутаты Нартай Сәрсенғалиев БҚО-ға келді. Бірінші сапары — Жаңақала ауданы. Аяқсыз қалған автокөлік жолын көрді, атқамінерлермен кездесті. Әлі жасалмаған, бітпеген «Чапай — Жаңақала» жолының сиқын көрді. Пост жазды, фактіні айтты. Бірақ, мердігердің «Ануш Құрылыс» ЖШС-і екенін жазбады. Фирманың басшысы — БҚО мәслихатының депутаты Оганнес Минасян екендігін көрсетпеді. Білмеді ме? Әлде, қасында болған аудан әкімі Алпамыс Кушкинбаев айтпады ма?» деп жазды қоғам белсенідісі Бауыржан Зәки фейсбуктегі парақшасында.
-Есесіне Жаңақала аудандық Қоғамдық кеңестің төрағасы Руслан Уразалиев шындықтың, кімнің-кім екенін, жолдың неге салынбағанын, техниканың жоқ екенін, Оганнес Минасян депутат болып та, мердігер кейпінде де басқарма арқылы Жаңақалаға шақырса да келмейтінін айтты, — деп жазды заңгер.
Бауыржан Зәкидің мемлекеттік тапсырыс саласын көп жылдан бері зерттеп, тіпті өзгелерге де үйретіп жүргенін батысқазақстандықтар жақсы біледі. Бұл жолы да ол Goszakup.gov.kz порталын сараптап, бұл жол құрылысына қатысты біраз ақпаратты көпшілікке ұсынды.
04.03.2024 ж. БҚО Жолаушылар көлігі және автомобиль жолдары басқармасы басшысы (Бауыржан Айтмагамбетов) және «Ануш Құрылыс» ЖШС-і басшысы (Оганнес Минасян) №37 шарт жасаған.
«Чапай — Жаңақала — Сайхын» 0-104 шақырым (таңдалмалы 40 км) облыстық жолды орташа жөндеу». Құны 2 892 285 468 теңге = 2,8 млрд. Мерзімі — 9 ай. Аванс 478 млн 19.03.2024 ж. төленген. Былтыр тек 2 км асфальт салынған.
20.01.2025 ж. Басқарма басшысы Марат Куанышалиев мердігер Оганнес Минасянмен қосымша шарт жасады. Мәні, құны солай қалды, тек мерзімі 31.12.2026 ж. дейін өзгерді. Содан бері тым-тырыс, мердігер өз міндеттерін орындамай жатыр.
Марат Қуаншалиев аудан жұртының сәлемін жеткізген Руслан Уразалиевке «Ануш Құрылыс» жұмысты 26.06.2025 ж. бастайды» деп уәде берген. Дәл қазір жолда техника да жұмысшы да жоқ.
Техқадағалаушы — «КустанайСпецСтрой» ЖШС (БСН 091040019633, дир. Абайхан Садық). Шарт құны — 66,3 млн, оның 10,5 млн-ын алған. Алайда, нысанда олар да жоқ.
«Ануш Құрылыс» қанша тендер алған?
27.01.2025 ж. — Орал ТҮКШ — 699 млн теңге — «Жолдарды ағымдағы жөндеу»
28.02.2025 ж. — Бәйтерек ТҮКШ — 799 млн теңге — «Қаражар, Поливное ауылына кірме жолды күрделі жөндеу»
28.02.2025 ж. — Бәйтерек ТҮКШ — 757 млн теңге – «Жалын, Мирное ауылына кірме жолды күрделі жөндеу»
18.03.2025 ж. — Орал ТҮКШ — 661 млн теңге — «Строитель мкр жолын орташа жөндеу»
03.04.2025 ж. — Орал ТҮКШ — 2,5 млрд теңге – «Ветелки ауылына кірме жолды күрделі жөндеу»
04.04.2025 ж. — Орал ТҮКШ — 330,6 млн теңге — «4 мкр жолын орташа жөндеу»
14.04.2025 ж. — Зашаған әкімі — 154,7 млн теңге — «Коминтерн ауылы, Беляев көшесін қайта құрылымдау»
22.04.2025 ж. — Шыңғырлау ТҮКШ — 976,4 млн теңге — «Шыңғырлау-Лубенка-Лебедевка» жолын күрделі жөндеу
07.05.2025 ж. — Сырым ТҮКШ — 1 млрд теңге – «Қособа ауылы 14-29 км кіре беріс жолды орташа жөндеу»
19.05.2025 ж. — Сырым ТҮКШ — 353,6 млн теңге – «Бұлдырты аулының 6 көшесі күрделі жөндеу»
13.06.2025 ж. — Орал ТҮКШ — 90,8 млн теңге — «Скоробогатов, Исаева, Победа көшесін күрделі жөндеу»
Биыл ғана 11 шарт — шамамен 8,3 млрд жұмыстарын алған. Бес жерде орналасқан 20 астам жол учаскелеріне үлгере ме?
2023 жылы Оганнес Минасян «Amanat» партиясының партиялық тізімі бойынша БҚО мәслихаты депутаты атанды. «Центр Содействия Политике Президента по Противодействию Коррупции» РҚБ-нің сайтында Оганнес Минасян өзі туралы былай жазған: «С 2018 г. состою в партии «Аманат». 30.03.2023 г. избран Депутатом в органы власти для представления интересов во властных структурах, защиты прав, закрепленных в Конституции и законах».
Қоғам белсендісі, заңгер Бауыржан Зәки жолды салмау әрекетсіздігі туралы облыс прокуроры Серік Шалабаевқа хат жолдаған.
