Қазақстанда ақбөкен етінің бір келісі 1600 теңгеге бағаланды. Бұл туралы Ауыл шаруашылығы министрлігінің баспасөз қызметі хабарлайды.
Министр Айдарбек Сапаровтың айтуынша, аталған баға әлі түпкілікті бекітілмеген. Қазіргі таңда экология министрлігі реттеу жұмысын жүргізіп жатыр.
Ет комбинаттарын өніммен қамту – ауыл шаруашылығы министрлігінің құзырында. Бүгінде ақбөкен етін өндіретін 18 кәсіпорын тіркелген. Алдағы уақытта баға, логистика және сату форматы нақтыланады.
Айта кетейік, бұған дейін Батыс Қазақстан облысында ақбөкендер ату басталды. 2025 жылғы әуеден жүргізілген санақ қорытындысы бойынша, өңірдегі киік саны 2,3 миллион басқа жеткен. Ғалымдардың есебінше, популяцияға зиян келтірмей, ақбөкендердің 20%-ы – шамамен 460 мың бас аулануы мүмкін.
