Көпбалалы отбасыларға берілетін жәрдемақы туралы ережеге өзгеріс енгізіледі. Бұл туралы Еңбек және халықты әлеуметтік қорғау министрі Светлана Жақыпова мәлімдеді.
Министрдің айтуынша, жаңа тәсіл әлеуметтік әділеттілік қағидатына негізделеді.
Қазір төрт баласы бар отбасыларға – 63 030 теңге, бес балаға – 78 800 теңге, алты балаға – 94 570 теңге, жеті балаға – 110 330 теңге, сегіз және одан да көп баласы бар отбасыларға да 110 330 теңге және әр келесі бала үшін қосымша 15 728 теңге көлемінде жәрдемақы төленеді. Ата-аналар электронды үкімет порталы, халыққа қызмет көрсету орталығына барып немесе екінші деңгейлі банктердің жүйелері арқылы жәрдемақыға өтінім бере алады.
««Көпбалалы ана» деген атақ бар. Ал дәл жанында, мысалы, жалғыз өзі бала тәрбиелеп отырған ана тұр делік. Ол жұмыс істемейді, баласына жететін қаражаты жоқ. Сонда көмекті кім алуы тиіс – жеткілікті табысы бар көпбалалы ана ма, әлде күн көрісі төмен жалғызбасты ана ма? Әлеуметтік әділеттілік дегеніміз – осы сұраққа жауап табу», – деді Жақыпова.
Бүгінде бұл пилоттық жүйе Шымкентте және Қарағанды облысында сынақтан өтіп жатыр. Оның ауқымын кеңейту үшін заңнамаға өзгеріс енгізу қажет.
Реформа шеңберінде әлеуметтік осал топтарды санатқа бөлмей, тек шын мұқтаж азаматтарға көмек көрсету ұсынылып отыр.
фото: gov.kz
