Ресейлік тележурналист Тигран Кеосаян комада жатыр. Бұл туралы оның әйелі, журналист Маргарита Симоньян телеграм арнасында жазды.
«Күйеуім Тигран Кеосаян клиникалық өлімді басынан өткеріп, комада жатыр. Көбі оның жүрегі бірнеше жылдан бері ауыратынын біледі», — деді ол жазбасында.
Сондай-ақ оны жақсы көретіндерден дүға жасауын сұраған.
Тигран Кеосаян қазақстандықтардың сынына 2022 жылы ұшырады. Ол 9 мамырдағы Жеңіс күніне шеру өткізуден бас тартқан Қазақстанға сес көрсетіп, мәлімдеме жасады.
«Украинаға қараңдар, дұрыстап ойланыңдар. Біздің жауапты адамдар Қазақстанмен қарым-қатынас деңгейін қайта қарауы керек», — деді.
Қоғамда талқыға түсіп, оның сөзіне қоғам белсенділері мен халық қарсылық білдірді. Ол Қазақстанның Украинадағы соғысқа қатысты бейтарап позиция ұстанғанына наразылығын осылай білдіргендей болды.
Кейін Қазақстан сыртқы істер министрлігі Кеосаянды «елге келуге тыйым салынғандардың» тізіміне қосты.
Тигран Кеосаянның әйелі Маргарита Симоньян «Эхо» радиостансасында берген сұхбатында «Ресей Қазақстанға тағы да әскер жіберсе қуанатынын айтқан еді.
Сурет: Ашық дереккөздерден
