2024 жылғы 11 желтоқсанда «ҚазМұнайГаз» ҰК АҚ еншілес ұйымы «КМГ ПетроХим» ЖШС мен «Теңізшевройл» ЖШС (ТШО) арасында құрғақ газды сатып алу-сату туралы жаңартылған келісімшартқа қол қойды.
Келісімшарт аясында ТШО Атырау облысындағы газ өңдеу зауытына жылына 9 млрд текше метрге дейін құрғақ газ жеткізіледі. Бұл шикізаттан алынатын этан жылына 1,25 млн тонна полиэтилен өндіретін зауытта пайдаланылады.
Газды бөлу кешені ТШО-ның құрғақ газынан кемінде 98% этан алуға мүмкіндік береді, ал алынған этан болашақ полиэтилен өндірісінің негізгі шикізатына айналады.
«ҚазМұнайГаз» ҰК АҚ Басқарма төрағасы Асхат Хасенов Қазақстанның мұнай-газ химиясы саласындағы маңызды жобаларды жүзеге асыру үшін келісімшарт шарттарын жаңартуға қадамдар жасалғанын айтты.
«Бұрын қол қойылған келісімшарттың бірқатар талабын қайта қарау арқылы Қазақстан үшін стратегиялық маңызға ие мұнай-газ химиясы саласындағы ГСК және Полиэтилен жобаларын жүзеге асыруға бір қадам жақындадық. Бұл жобалар, ең алдымен, еліміздің одан әрі индустриялық және экономикалық дамуына бағытталған», — деді.
«Теңізшевройл» ЖШС бас директоры Кевин Лайон да құрғақ газды жеткізу туралы жаңартылған келісімшарт — бұл саладағы стратегиялық қадамның бірі екенін атап өтті.
«ТШО — елдің мұнай-химия өнеркәсібін дамыту стратегиясын қоса алғанда, Қазақстан Республикасының энергетика саласына айтарлықтай қолдау көрсететін бірден-бір кәсіпорын. ГСК жобасы үшін құрғақ газды сатып алу-сату туралы жаңартылған келісімшартқа қол қою – мұнай-химия саласындағы маңызды кезең. Ал ТШО үшін бұл негізгі шикізат жеткізуші компания ретінде үшінші ірі жоба», — деді бас директор.
Айта кетейік, Газ Сепарациялық Кешені (ГСК) — Қазақстанның Атырау облысында салынып жатқан маңызды мұнай-газ химиясы жобасы. Бұл кешен құрғақ газдан этанды бөліп алуға арналған, оны кейіннен полиэтилен өндіруде шикізат ретінде пайдалану жоспарланған.
Осыған дейін Атыраудағы полиэтилен зауытының құрылысы басталғанын жазған едік. 2024 жылы 11 қыркүйекте «Ұлттық индустриялық мұнай-химия технопаркі» арнайы экономикалық аймағында жылына 1,25 миллион тонна полиэтилен өндіретін зауыт құрылысы басталған еді. Жобаның инвестициялық құны — 7,4 миллиард АҚШ доллары. Құрылыс жұмысы 2029 жылы аяқталады деп жоспарланды.
Үкімет басшысы Олжас Бектенов «Полиэтилен» зауыты туралы :
«Полиэтилен» жобасын шикізатпен (этанмен) қамтамасыз ету үшін Теңіз кен орнында газ бөлу кешені (ГСК) салынады. ГСК қуаты жылына 9,1 млрд м3 құрғақ газды қайта өңдеу, оның ішінде 1,6 млн тонна Этан бөлу көзделіп отыр. Этан теңізден «Қарабатан» алаңына («НИНТ» АЭА аумағы, Атырау облысы) дейін Магистральдық құбыр арқылы бағытталатын болады, онда полиэтилен өндіретін зауыт жұмыс істейтін болады» — деген еді.
Сурет: kmg.kz
