Биыл БҚО-да спорт саласындағы жемқорлық фактілері бойынша бірнеше заң бұзушылықтар орын алды.
2024 жылы Батыс Қазақстан облысы мен еліміздің басқа аймақтарында спорт саласындағы жемқорлық деректері тіркелді. Бюджет қаражатының мақсатсыз жұмсалуы, тиімсіз басқару және заңсыз әрекеттер анықталды.
ҚР Сыбайлас жемқорлыққа қарсы іс-қимыл агенттігінің мәліметінше елде сенімгерлік басқаруға өткен бірнеше нысан мемлекет меншігіне қайтарылды. Оның қатарында БҚО-да «Ақжайық» футбол клубының ғимараты мен стадионы, сондай-ақ қысқы спорт түрлері бойынша балалар-жасөспірімдер спорт мектебі бар екені айтылған. Сонымен қатар Жоғарғы сот БҚО теннис мектебін сенімгерлік басқаруға беру заңсыз деп тапқанын жазған едік.
Батыс Қазақстан облысындағы «Ақжайық» футбол клубына 2024 жылы мемлекет 400 миллион теңге бөлген еді. Алайда қаражат су тасқынының шығындарын жабуға жұмсалды. Осы жолы клубқа мемлекет қаражат бөлген жоқ.
2024 жылы ақпан айында стадион басшысы Оралбай Жақсымбетов 57 миллион теңгені жымқырды деген күдікпен қамауға алынды.
Маңғыстау облысының прокуратурасы «Каспий» футбол клубында оқу-жаттығу жиындарына бөлінген 27 млн теңгеден астам қаржының жымқырылғанын анықтады. Тергеу барысында клубтың бұрынғы басшысы екі танысымен бірге клуб қызметкерін күш қолдану арқылы айғақтарды өзгертуге мәжбүрлегені және одан 15 млн теңге қорқытып алуға тырысқаны белгілі болды.
Қазіргі уақытта тергеу жалғасуда.
Республика бойынша жалған спорттық іс-шараларды өткізуге және жалақыға қосылған негізсіз үстемақыға 1,3 млрд теңге жұмсалғаны анықталып, бюджетке қайтарылды. Оның ішінде, Астана қаласы – 398 млн теңге, Қостанай облысы – 350 млн теңге, Алматы қаласы – 182 млн теңге, Түркістан облысы – 53 млн теңге.
Биыл футбол клубтарын қаржыландыру 2,2 млрд теңгеге қысқарды. Түркістан облысы – 1 млрд теңге, Ақмола облысы – 390 млн теңге, Қостанай облысы – 350 млн теңге, Павлодар облысы – 300 млн теңге, Жетісу облысы – 146,2 млн теңге.
Антикор ҚР Туризм және спорт министрлігінің «Спортты дамыту дирекциясы» басшысы мен орынбасарына қатысты тергеу аяқталғанын хабарлады. Оларға 584 млн теңге бюджет қаражатын спорт жабдықтарын сатып алу және туроператорлармен келісімшарттар арқылы жымқырды деген айып тағылды. Айта кетейік, кәсіпорын директоры 2021 жылы Батыс Қазақстан облысында футбол мен допты хоккейді дамытуға бөлінген 161,9 млн теңгені ұрлаған.
Сурет: Pexels.com
