Швейцариялық Gunvor сауда компаниясы «Лукойлдың» шетелдік активтерін сатып алу туралы ұсынысын қайтарып алды. Бұл туралы компанияның X әлеуметтік желісіндегі ресми парақшасында хабарланды.
Мәлімдемеде Gunvor өз еншілестері мен қызметі туралы әрдайым ашық ақпарат беріп келгенін, санкцияларға сай ресейлік активтерін сатқанын және Украинадағы соғысты жария түрде айыптағанын атап өтті.
Таяуда АҚШ Қаржы министрлігі «Gunvor — Кремльдің марионеткасы» деген мәлімдеме жасады. Компания бұл айыптаманы «түбегейлі жалған және шындыққа жанаспайды» деп атады.
Естеріңізге сала кетейік, АҚШ пен Англия санкцияларының әсерінен Ресейдің «Лукойл» мұнай компаниясы шетелдегі активтерін сатуды қолға алды. 22 қазан күні АҚШ-тың қаржы министрлігі «Роснефть» пен «Лукойл» мұнай компанияларына санкция салғанын хабарлады.
2022 жылы Ресейдің Украинаға басып кіруіне байланысты әлемнің 60 елі мен халықаралық ұйымдар Мәскеуге қатысты саяси және экономикалық санкциялар енгізді. 2025 жылдың шілде айында Еуроодақ Ресейге қатысты 18-санкциялық пакетті бекітті.
фото: istockphoto.com
