«Оқ тиді ме, құстарға соғылды ма»? Сәрсенбі күні таңертең Ақтау маңына құлаған Azerbaijan Airlines әуе компаниясының Embraer 190 ұшағының апаттан кейінгі қара жәшігі табылды. Қазір сараптама жүріп жатыр.
Embraer 190 жолаушылар ұшағы Баку-Грозный № J2-8243 рейсін орындау кезінде Ақтау қаласынан 28 шақырым жерде құлады. Соңғы мәліметтер бойынша, бортта болған 67 адамның 38-і қаза тапты, 29 адам ауруханаға түскен.
«Қайтыс болғандардың денесі өртенген, барлығы жиналды, қазір мәйітханада. Қаза тапқандардың арасында Қазақстаннан 6 адам болды. Оның екеуі бала», — деді вице-премьер Қанат Бозымбаев.
Әзербайжанның 37 адамы бар, оның 23-і қаза тапты, 14-і аман. Қырғызстанның үш азаматы аман.
Ресейдің 16 адамның жетеуі қаза тауып, тоғызы аман қалды. Қазақстандық алты адамның үшеуі Маңғыстау облысынан, біреуі Қостанай облысынан, біреуі Астанадан.
Экипаждың екеуі қаза болып, үшеуі тірі қалған.
Авиация маманы Абыл Кекілбай Азаттыққа берген сұхбатында экипаждар ұшақты білікті басқарғанын айтты.
«Экипаж мүшелері тәжірибелі маман екенін көрсетті. Себебі әуежайға жете алмаса да адамдар жоқ жерге, кең жерге апарып қондыруға тырысты. Бұдан бөлек шамасы келгенше адамдарды аман алып қалуға тырысты. Қолдарынан келгенін жасады», — деді авиа сарапшы.
Ұшақ апатының себептеріне қатысты әлеуметтік желіде әр түрлі болжамдар айтылып жатыр. Алғашқы мәліметтерде ұшақтың құстарға соғылуы мүмкін деген пікір айтылса, кейіннен әуе кемесіне оқ тиген болуы мүмкін деді.
Вице-премьер Қанат Бозымбаев ұшақ бортындағы тесіктердің суреттеріне қатысты пікір білдіре отырып, «Тергеу барлық сараптамаларды жүргізеді, ал әзірге нақты ештеңе айту мүмкін емес», деп мәлімдеді.
Тергеудегі Orda.kz дереккөзінің хабарлауынша, Әзірбайжан мен Ресей тергеу тобына қосылуға ресми өтініш жасаған. Бірақ Қазақстан өтінішті қабылдамады. Қара жәшік пен барлық дәлелдер Қазақстанның бақылауында болатынын айтқан.
Сурет авторы: Азамат Сарсенбаев
