Бұл туралы облыс әкімі Ғали Есқалиев төрағалығымен өткен кеңес отырысында құрылыс басармасының басшысы Әлібек Антазиев хабарлады. Республика бойынша тұрғындарды ауыз сумен қамту көрсеткіші бойынша облыс 9-орында тұр. 2000 жылы облыс тұрғындарының 31%-ына ғана сапалы су берілсе, былтыр бұл көрсеткіш 88,4%-ға дейін өсті. Әлібек Антазиев Үкімет тапсырмасына сай 2025 жылы облысты таза сумен толық қамту жоспарланып отырғанын айтты.
Облыс әкімі Ғали Есқалиев ауылдарға су құбырын тартуды жеделдетуді тапсырды. Ол үшін кешенді блок-модульдерді орнату керектігін айтты. Онлайн байланысқа шықан Қазталов ауданының әкімі Альберт Есалиев топтық су құбырын пайдалануды ұсынды. Ғали Есқалиев оған қыруар қаржы керектігін, су құбырының желісінен елді мекендер қашық болмаған жағдайда ғана осы нұсқа қолайлы болатынын ескертті. Құрылыс басқармасының басшысы Әлібек Антазиевтің айтуынша, кешенді блок-модуль тұрғын саны 200-ге дейін ауылдарға орнатылады. Облыста дәл осындай 120 шағын ауыл бар. КБМ-ды күтіп ұстауға жыл сайын 1-2 млн теңгедей қаражат жұмсалады. Бір қондырғының орташа құны – 8-17 млн теңге. Әзірше, кешенді блок-модульдердің жұмыс істеуіне, жөнделуіне жауапты болатын қай мекеме болатыны туралы сұрақтың басы ашық күйінде тұр.
Жыл сайын Орал қаласында ауыз суға тапшылық ұлғаюда. Әсіресе, жаздыгүні қала тұрғындарының тәулігіне тұтынатын су көлемі 67 мың текше метрге жетеді. Қалыпты жағдайда 40 мың текше метр су пайдаланылады. Тұрғындар сұранысын Жайық өзені мен қала маңындағы жер асты су қоры қамтамасыз етуде. Соңғы жылдары Жайықтағы су деңгейі өте төмен түсіп кетті. Сондықтан қала әкімдігі тағы да жаңа ұңғымаларды іске қосу арқылы мәселенің түйінін шешпек. Дегенмен Зашаған кентінде көп қабатты үйлер саны көбейіп, облыс орталығына қоныс аударушылар саны жыл санап артып келеді. Оған қоса жаңа шағын ауданды тұрғызу бірнеше жылдан бері жоспарда тұр. Қала басшысының есептеуінше, тұрғындар санының көбеюіне байланысты Тасқала топтық су құбырын тарту – осы мәселенің төте шешімі болмақ.
Айта кетейік, «Нұрлы жер» мемлекеттік бағдарламасының нысаналы индикаторына қол жеткізу мақсатында биыл облыс бойынша 21 ауылдық елді мекенде жалпы сомасы 5,8 млрд теңгеге, оның ішінде республикалық бюджеттен – 5,3 млрд теңгеге, жергілікті бюджеттен – 0,5 млрд теңгеге 20 сумен жабдықтау нысанын салу және қайта жаңарту жұмысы жүргізілуде.
sarapshy.info
