АҚШ Геологиялық қызметінің (USGS) мәліметінше, 28 наурызда Мьянмада 6,4 балдық жер сілкінісі болды. Алайда, кейбір ақпарат көздері зілзаланың магнитудасы 7,7 балл деп жазып жатыр.
Жер сілкінісі Мьянмамен қатар Бангладеш, Үндістан, Таиланд, Лаос және Қытайда да сезілген. Дүмпулер жергілікті уақыт бойынша 12:32-де, Сагайна елдімекенінің оңтүстік-шығысында, 18 шақырым қашықтықта тіркелген. Жерасты қозғалыстары 10 км тереңдікте болған.
Reuters агенттігі жер сілкінісі Таиланд халқының үрейін ұшырғанын жазды. Бангкок пен Янгон тұрғындары қауіпсіз жер іздеп, үйлерінен жаппай сыртқа шыққан.
Мьянманың ең ірі қалаларының бірі Мандалайдың үш тұрғыны Reuters агенттігіне жер сілкінісі кезінде бірнеше ғимараттың құлағанын айтқан. Олар жер сілкінісі басталған кезде көп адамның көшеге қашып шыққанына куә болған.
Қазіргі уақытта зардап шеккендер туралы ресми мәлімет жоқ.
Қазақстанда да жер сілкінді
Бүгін, 28 наурызында түнде Жамбыл облысының бірқатар аудандары мен Тараз қаласында жер сілкінісі тіркелді.
Жер дүмпуінің жоғары қарқыны – 5 балл – Меркі ауданындағы Меркі ауылында тіркелді. Т. Рысқұлов ауданының Құлан ауылында жер сілкінісінің күші 4 баллды, Тараз, Шу қалаларында, Қордай, Мойынқұм аудандарында – 2 балл болған.
«Алдын ала мәлімет бойынша Т.Рысқұлов ауданы Қарақыстақ ауылындағы мәдениет үйі, Меркі аудандық ауруханасы, Ойтал ауылындағы мектеп ғимаратының қабырғасында жарықтың пайда болғаны анықталды. Басқа нысандар туралы ақпарат нақтылануда», — делінген Жамбыл облысы әкімдігінің телеграм арнасында.
Қазіргі уақытта зардап шеккендер мен қираған ғимараттар туралы ақпарат тіркелмеген.
Cурет: x.com/WeatherMonitors
