Перизат Қайраттың «Biz birgemiz Qazaqstan 2030» қоғамдық бірлестігі жабылады. Бұған қатысты Астана қаласының мамандандырылған ауданаралық экономикалық сотында шешім шықты.
«Бірлестікті құру кезінде анықталған бұзушылықтарды ескере отырып, сот «Biz birgemiz Qazaqstan 2030» қоғамдық бірлестігін мәжбүрлі түрде тарату туралы шешім қабылдады», — делінген сот хабарламасында.
Сот материалдарына сәйкес, тергеу барысында құрылтай құжаттарына 10 құрылтайшының 9-ының атынан бір ғана адам – Қайрат Перизат қол қойғаны дәлелденген.
Сондай-ақ сот хабарламасында ҚР Жоғарғы Сотының «Соттардың салық заңнамасын қолданудың кейбір мәселелері туралы» нормативтік қаулысының 12-тармағына сәйкес егер қандай да бір ұйымды тіркеу кезінде жалған мәліметтер енгізілсе мұндай ұйымды сот шешімімен тарата алатыны жазылған.
Сот шешімі заңды күшіне енген жоқ.
Перизат Қайрат қор қаржысын жымқырды деген күдікпен тергеліп жатыр. Одан бөлек осы іс бойынша Орал қаласының бір тұрғыны күдікті деп танылған болатын.
Сурет: Перизат Қайраттың жеке парақшасынан
