Елде жалған шетел валютасын өткізу фактісі жиілеп кетті. Бұл туралы Қаржылық мониторинг агенттігі хабарлады.
Соңғы уақытта Алматы қаласы мен Батыс Қазақстан облысында жалған ақшаны сатуға байланысты бірнеше оқиға тіркелді. Қазақстан бойынша жыл басынан бері 1 060 жалған банкнот тәркіленді. Бұл туралы хабарламада төмендегідей деректер көрсетілген:
“Қазақстан аумағында айналымнан 1 060 жалған банкнот тәркіленді, оның ішінде ұлттық валютада 647 000 теңге сомасына 141 дана, 90 400 АҚШ долларына 905 купюра, 2 000 еуроға 4 купюра, 1 000 юань сомасына 10 купюра. Алынған жалған банкноттардың жалпы сомасы 43 млн теңгеден асады”.
Алматы қаласында бір топ адам жалған 100 доллар сатумен айналысқан. Қылмысқа қатысы бар күдіктілердің тұрғылықты жерін тексерген кезде 149 дана (14 900 АҚШ доллары) жалған доллар табылды.
Одан бөлек Батыс Қазақстан облысында жалған валютаны өткізу дерегі тіркелді. ҚМА мен полиция Орал қаласындағы лотерея клубтарының бірінде бірнеше адамның бірігіп, 25 000 АҚШ доллары мен 10 000 евроны көзбояушылықпен жұмсағанын анықтап отыр. Күдіктілер бәс тігу мақсатында жалған ақшамен шоттарын толықтырған.
Жоғарыда аталған екі жағдайда да құқық бұзушылар ұсталып, соттың санкциясымен «қамауда ұстау» шарасы қолданылды.
Қаржылық мониторинг агенттігінің мәліметі бойынша биыл дәл осы фактілермен 8 адам 5 жылдан 6 жылға дейінгі мерзімге бас бостандығынан айырылды.
Агенттік Қазақстан азаматтарына бейтаныс адамнан ақша айырбастамау керек екенін ескертеді. Осындай жағдайға куә болғандар «АФМ Insider» телеграм ботына аноним хабар жібере алады.
Сурет: lifehacker.ru
