Қазіргі репетиторлардың дәурені министрлік жүргізген реформалардың жемісі. Жүйесіздік пен шалағайлық білім саласын осындай жағдайға жеткізді. Біресе біреуге, біресе екіншіге еліктеп, білім жүйесін сынақ алаңына айналдырдық. Нәтижесінде мектепте сабақ түсінбейтін, қосымша сабаққа тәуелді ұрпақ өсіп келеді.
Біз шетелдің өнімін пайдаланғанды жақсы көреміз, бірақ олардың өмір сүру стандарттарын қабылдауға құлықсызбыз. Жапонның көлігін мініп жүрміз, бірақ жапондардың еңбекқорлығын үйренгіміз келмейді. Америкалықтар секілді жоғары жалақы алғымыз келеді, бірақ олардың даму моделін енгізуге тырыспаймыз. Әлемдік үрдістерді жартылай ғана алып, реформаларды толық жүргізбегеннен кейін түк шықпайды.
Біз балаларды ағылшынша оқытамыз дедік. Нәтижесінде ең қабілетті жастарымыз шетелге кетіп жатыр. Мықты кадрларды ұстап қалу қиындады. Біздің ең дарынды оқушыларымызды шетелдің экономикасын дамытуға даярлап жатқанымыз өкінішті. Сондықтан маған ауылдан келген, ағылшын мен орыс тілін білмейтін балалар көбірек ұнайды. Олар елімізде қалады, ал қалғандары бәрібір сыртқа кетіп жатыр.
Асқар Жұмаділдаевтың ой-пайымы
