Қытайда жалғызбастыларға арналған «Өліп қалдың ба?» дейтін қосымша кең тарап жатыр екен.
Аты біртүрлі қосымшаның алгоритмі қарапайым: екі күннің бірінде оның қолданушысы өзінің тірі екенін білдіретін түймені басуы керек. Баспаса, қосымша автоматты түрде жедел байланыс орталығына «бұл адам бірдеңеге ұшыраған болуы мүмкін деген» сыңайда хабарлама жібереді.
Осы қосымшаны ақылы екеніне қарамастан, үлкен қалада жалғыз тұратын жастар көп қолданатын болған.
2030 жылға қарай Қытайда 200 миллион жалғызбасты болады деген болжам бар. Яғни қосымшаны қолданатындар саны тағы өсуі мүмкін. Енді осы қосымшаның авторлары қарттарға арналған нұсқасын әзірлеп жатыр екен. Себебі қазір Қытайдағы 1 жарым миллиард адамның бестен бірінің, яғни 300 миллионға жуығының жасы 60-тан асып кеткен.
Қытай билігі қазір отбасын құру, бала туу санын көбейтуді ынталандыру үшін мемлекеттік бағдарламаны қолға алған. Өйткені қарттардың көбейгені ел экономикасына үлкен салмақ салып жатыр. Бірақ оның жақсы нәтиже беретініне әзірге өздерінің де көзі жетпейді. Себебі мынада. Қытайда зейнетақы жоғары. Есесіне баланы дүниеге әкелу, балабақшасы, мектебі, жоғарғы оқу орнында оқыту өте қымбат. Коммунистік режим аталғанымен Қытай әлдеқашан капиалистік қоғамда өмір сүріп жатыр. Сондықтан қытай жастары бөлек отау құрғаннан көрі әке-шешесінің үйінде тұра бергенді жөн көреді. Бұл құбылыс Қытайда «Тегіс жатыс» деген атауға да ие болып үлгеріпті. Яғни көшеге шықсаң шығын, одан да жағдайымды жасап алғанша бойдақ болып әке-шешемнің үйінде жата берейін деген түсінік кең тараған.
Дәнеш Байболатовтың facebook парақшасынан
