Батыс Қазақстанда он адамға сан соқтырған күдікті құрықталды. Бұл туралы Polisia.kz хабарлады.
Оқиғаның мән-жайы
Белгілі болғаны, БҚО полиция департаменті киберқылмысқа қарсы іс-қимыл басқармасының қызметкерлері 31 жастағы Ақтөбе қаласының тұрғынын ұстады. Ол бірқатар алаяқтық әрекеттер жасады деген күдікке ілініп отыр.
«Тергеу барысында күдіктінің әлеуметтік желі арқылы адамдармен танысып, түрлі сылтаумен, соның ішінде басқа оқу орындарына ауыстыруға көмектесемін және жүргізуші куәлігін алып беремін деп уәде беріп, азаматтардың ақшасын алдап алғаны анықталды. Оның әрекетінен Батыс Қазақстан облысының он тұрғыны зардап шеккен. Келтірілген жалпы шығын 1 млн 400 мың теңгені құрайды», — делінген хабарламада.
Жедел-іздестіру нәтижесінде күдікті Алматы қаласында ұсталып, Орал қаласына жеткізілді. Қазір уақытша ұстау изоляторына қамалды.
«Аталған факті бойынша қылмыстық іс қозғалды. Қазіргі таңда тергеу амалдары жүргізіліп жатыр. Сонымен қатар оның Қазақстанның басқа өңірлерінде осындай қылмыстарға қатысы бар-жоғы тексерілуде», — деп хабарлады ІІМ-нің баспасөз қызметі.
Елде алаяқтық қылмыстардың көбеймесе, азаятын түрі жоқ.
Жақында Ақмола облысында алаяқтықпен айналысқан қылмыстық топқа қатысты тергеу аяқталды. Бас прокуратура олардың арасында Қаржы нарығын реттеу және дамыту агенттігі орталық аппаратының, сондай-ақ бірқатар банктердің, оның ішінде «Kaspi Bank», «Forte Bank», «Еуразиялық Банк», «Jusan bank» қызметкерлері болғанын хабарлады.
Алаяқтар Қазақстан азаматтарына жол ережесін бұзғаны үшін жалған айыппұл жіберетін жаңа айла ойлап тапқан. Қаскөйлер жүргізушілерге электрондық пошта мен мессенджерлер арқылы көлік нөмірі мен айыппұл төлеуге арналған сілтемесі бар жалған хаттар таратып жатыр. Бұл – интернет-алаяқтықтың бір түрі.
2024 жылы Қазақстан азаматтарына интернет-алаяқтықтан келген залалдың қаржылай көлемі 10 миллиард теңгеден асып, жаңа рекорд қойылды. Осы ақшаның барлығы дерлік шетел асып кетті деуге болады.
Фото: Pexels.com
