5 тамыз күні Орал қаласындағы Айталиев көшесінде орналасқан сүт комбинаты аумағында өрт шықты. Өрт кәсіпорын аумағында бөлек тұрған бір қабатты ыстау ғимаратынан басталып, кейін екі цехтың шатыры жанған.
Бұл туралы БҚО төтенше жағдайлар департаменті хабарлады.
Департаменттің мәліметінше, өртенген цехтардың бірінде тоңазытқыш жабдықтары мен дайын өнім, ал екіншісінде балмұздақ өндіруге арналған құрылғылар орналасқан. Өрттің ауданы шамамен 3000 шаршы метрді құрады.
Күшті жел құтқарушылардың жұмысын, өртті ауыздықтауды қиындатқан.
Зардап шеккендер туралы ақпарат жоқ. Өрттің шығу себебі әлі белгісіз.
Сүт комбинаты — «Батыс Қазақстан облыстық сүт комбинаты – Береке» ЖШС-на тиесілі. Құрылтайшысы — Қымбатбек Айдарбеков.
Посмотреть эту публикацию в Instagram
Statsnet сайтындағы мәлімет бойынша комбинатта 20-ға жуық адам жұмыс істейді. ЖШС-ның басшысы — Гүлжан Айдарбекова. Компанияның болжамды жылдық табысы — 804 070 894 теңге.
ҚазАқпарат дерегінше кәсіпорын цехында 2016 жылы құны 400 млн теңге болатын италиялық жабдық орнатылған. Соның арқасында сегіз тонна балмұздақ өндіре алатыны жазылған.
фото: ТЖМ видеосынан алынған кадр
