Тамыз айында Батыс Қазақстан облысында коммуналдық төлем мен сұйытылған газ бағасы өсті.
Енді көлікке құйылатын газ да, үйдегі жарық та, ыстық су да бұрынғыдан қымбатырақ болады. Тарифтердің көтерілуі отын құнының өсуіне және инвестициялық бағдарламалар аясында бекітілген тарифтерге байланысты.
Электр қуаты
1 тамыздан бастап елдегі электр қуатын өндіретін компаниялардың қызмет құны өсті.
Батыс Қазақстан облысындағы «Жайық жылу қуат» АҚ электр тарифін 13,25 теңгеден 13,95 теңгеге көтерді.
Соған сәйкес 5 тамыздан бастап электр энергиясының жаңа тарифтері күшіне енеді. Бұл туралы«Батыс Қазақстан АЭЖК» ЖШС ресми сайтына ақпарат жариялады.
Жаңа тарифтерді бекітуге арналған қоғамдық тыңдау 18 шілдеде өтті.
Содан жаңа орташа босату тарифі 32,52 теңге деп бекітілді.
Сараланған тарифтер де өзгерді:
- I деңгей (70 кВт/сағатқа дейін) – 30,79 теңге (бұрын – 26,44 теңге);
- II деңгей (70–120 кВт/сағат аралығы) – 39,03 теңге (бұрын – 33,79 теңге);
- III деңгей (120 кВт/сағаттан жоғары) – 48,79 теңге (бұрын – 42,24 теңге).
Жылу тарифі
«Жайық жылу қуат» кәсіпорны 1 тамыздан бастап жылу және ыстық су тарифі өскенін хабарлады. Тұрғындар үшін жылу энергиясы қосымша құн салығын есептегенде 218,80 теңге, ыстық су 1347,71 теңге деп бекітілді.
2025 жылдың 1 шілдесінен бастап Орал қаласында жылу энергиясының тарифі 2%-ға қымбаттады. Бұл туралы «Жайық жылу қуат» АҚ-ның«Монополист» базасындағы ресми мәлімдемесінде айтылған.
Компанияның хабарлауынша, тарифтің шілде айындағы өсуі көгілдір отынның 30%-ға қымбаттауымен тікелей байланысты.
Еске сала кетейік, 2025 жылдың маусымында аталған кәсіпорын алдағы үш жылға арналған жылу энергиясы өндірісі, тасымалдау, тарату және жеткізу қызметтеріне қатысты реттелетін дифференциалды тарифті бекіткен болатын. Ол 5 маусымнан бастап күшіне еніп, тарифтің кезең-кезеңімен өсуін қарастырады.
Сұйытылған газ
2025 жылдың 1 тамызынан бастап Қазақстанның бірқатар өңірінде сұйытылған мұнай газының (автогаз) шекті бөлшек бағасы өзгерді. Энергетика министрлігінің жаңа бұйрығына сәйкес жанармай құю бекеттеріндегі баға енді төмендегі шекті деңгейден аспауы тиіс.
Астана, Алматы, Ақмола, Павлодар, Қарағанды, Солтүстік Қазақстан, Қостанай облыстарында 1 литр автогаздың шекті бағасы – 112 теңге. Қашықтағы елді мекендер үшін бұл көрсеткіш 117 теңгеге дейін жетеді. Ал Маңғыстау облысында көгілдір отынның шекті бағасы ең төмен – 72 теңге (алыс аудандарда – 77 теңге).
1 ақпанда мемлекет сұйытылған газ бағасын көтерген еді. Сұйытылған отын бағасы жыл басынан бері екінші рет қымбаттап отыр.
Энергетика министрлігі автогаз құны біртіндеп бензин бағасымен теңеседі дейді.
Sarapshy.info шілде айында өңірдегі автогаз мәселесін зерттеді. «БҚО-дағы газ тапшылығын қалай шешуге болады?» тақырыбында жазылған мақаланы оқи аласыз.
Ескерту: кестеде берілген тарифтер құны қосымша құн салығымен есептелген
фото: freepik.com
