Қазақстанда цифрлық активтерді жинақтауға арналған арнайы крипторезерв – «криптосейф» құру мәселесі талқыланып жатыр. Бұл туралы Ұлттық банк төрағасы Тимур Сүлейменов мәлімдеді.
Крипторезерв үш негізгі жолмен толтырылуы мүмкін: тәркіленген биткоиндар, мемлекеттің өзі майнинг арқылы өндіретін криптоактивтер және алтын-валюта резервінің бір бөлігі. Егер мемлекеттік құрылымдар майнингпен айналысса, одан түскен салықтар мен міндетті төлемдер осы қорды толықтыра алады.
Сүлейменовтың сөзінше, криптовалюта болашақта Ұлттық қор мен алтын-валюта резервінің балама инвестициялық портфелінің құрамына енуі мүмкін. Ол криптоиндустрияның табысы қаншалықты жоғары болғанымен, тәуекелге бел бууды талап ететін сала екенін атап өтті. Сондықтан бұл шешім асығыстықпен емес, жан-жақты сарапталып қабылдануы тиіс.
Ұлттық банк Норвегия, АҚШ пен Таяу Шығыс елдерінің тәжірибесін зерттеген. Онда криптовалюталарға тікелей инвестициялар, сондай-ақ криптобиржалармен байланысты компаниялар акцияларын немесе ETF құралдарын сатып алу арқылы жасалған қаржылық қатысулар кездеседі.
Ұлттық банк бұл мәселе үкіметпен бірлесіп шешілетінін, жоба басталатын кезде лимиттер мен ережелер анықталатынын хабарлады.
фото: Ұлттық банк сайтынан