19 маусым күні Маңғыстау облысының Қарақия ауданына дрон құлады, деп жазды Lada.
Ұшатын құрылғы Болашақ темір жол станциясының маңында табылған. Осы жерге құқық қорғау органдары мен шұғыл қызмет мамандары барды.
Облыстық полиция департаменті дронның елді мекеннен қашық жерге құлағанын хабарлады.
«Ешқандай залал болған жоқ. Оқиғаның барлық мән-жайы анықталуда», — деп мәлімдеді ПД баспасөз қызметі.
Sarapshy.infо наурыз айында Батыс Қазақстан облысының аумағына төрт дрон құлағанын жазды. Кейін ақпан-наурыз айында кем дегенде сегіз құрылғы табылғаны белгілі болды. Ішкі істер министрлігі осыған байланысты редакция жолдаған сауалға нақты жауап бермей, тек тексеріс жүргізіліп жатқанын хабарлады.
Маусым айының басында Қорғаныс министрінің бірінші орынбасары Сұлтан Камалетдинов дрондардың Ресейден ұшырылғанын айтты.
«Батыс Қазақстан облысының аумағында анықталған ұшқышсыз ұшатын аппараттардың көбі, яғни 90%-дан астамы Ресей Федерациясының 926-шы Бас ұшу-сынақ орталығының полигонына тиесілі», — деп түсіндірді Камалетдинов.
фото: lada.kz
