Кодекске «су қауіпсіздігі», «экологиялық ағын» деген ұғымдар енді. Заңдағы өзгерістер туралы Су ресурстары және ирригация министрлігінің баспасөз қызметі баяндады.
Енді су бассейндері бойынша кеңестер құрылады. Кеңес мүшелері әкімдіктерге немесе салалық мекемелерге қуаңшылықты болдырмау, су тасқынының алдын алу бағытында ұсыныстар айта алады.
Кодекс бойынша көлемі кіші өзендерге тұйық бөгеттер салуға тыйым салынады. Жергілікті атқарушы органдар су қорғау аймақтары мен белдеулерінің шекарасын айқындауы керек.
Министрлік пен басқа ведомстволардың құзірет-міндеті нақты белгіленді. Су ресурстары министрлігі жыл сайын су ресурстарын пайдалану туралы есепті жариялайды.
Шаруашылықтар еріген қар суын өз еркімен пайдалана алады. Ол үшін тек 2 млн текше метрден аспайтын тоған немесе басқа нысанды салу үшін инспекциядан рұқсат алу керек.
«Жаңа кодекс аясында Азаматтық, Жер, Кәсіпкерлік, Орман және Экология кодекстеріне, сондай-ақ 13 заңға өзгерістер енгізілді. Жер кодексіне елді мекендердегі су объектілерінің жерлерін пайдалануды реттеу бөлігінде түзетулер енгізілді», – деп хабарлады министрлік.
фото: gov.kz
