Қазақстанда қоғамдық орындарда қоқыс тастау, өсімдік жұлу, инфрақұрылымды жұлуға қатысты әкімшілік жаза қатаңдайды. Бұл жөнінде Экология және табиғи ресурстар министрлігі хабарлады.
Енді Әкімшілік құқық бұзушылық туралы кодекстің 434-2 («Ортақ пайдаланылатын орындарды ластау») және 505-баптарын («Қалалар мен елдi мекендердiң аумақтарын абаттандыру қағидаларын бұзу») бұзғандарға бірден әкімшілік хаттама толтырылады. Бұған дейін бұл өкілеттік тек құқық қорғау органдарына тиесілі еді.
Өткен жылы аталмыш құқық бұзушылық үшін 591 мыңнан астам адам жауапкершілікке тартылған. Олар 5,2 млрд теңге айыппұл төледі.
2025 жылдың желтоқсан айында кодекс аясында бірқатар заңнамалық акт қабылданды. Түзетулер 2026 жылдың наурыз айында күшіне енеді.
