Түркістан қаласындағы «Ямми Маки» дәмханасынан пицца, суши және чикен тағамын сатып алған 57 адам уланып, ауруханаға түсті. Олардың ішінде 28-і – кәмелет жасқа толмаған балалар, ал біреуі жүкті әйел.
Түркістан облыстық санитарлық-эпидемиологиялық бақылау департаментінің мәліметінше, уланған 57 адамның 49-ы – Түркістан қаласының тұрғындары. Уланған науқастар ауруханаға жеткізілген, олардың 22-сі стационарлық ем қабылдап жатыр, ал қалғандары үй жағдайында емделіп жатыр.
Ресми ақпаратқа сәйкес фаст-фудты тапсырыспен үйге алдырған тұтынушылар тамақтан кейін іш өту, құсу, бас айналу, дененің мұздауы, еріннің көгеруі сияқты белгілерге шағымданған. Оқиға орнына жедел жәрдем шақырылып, барлық науқасқа медициналық көмек көрсетілген. Қазіргі уақытта микробиологиялық зерттеу жүргізіліп жатыр.
Түркістан облыстық полиция департаменті Қылмыстық кодекстің 304-бабы («Санитария қағидалары немесе гигиеналық нормативтерді бұзу») бойынша қылмыстық іс қозғағанын хабарлады.
Тергеп-тексеру барысында дәмхананың тиісті құжаттары толық емес екені анықталды. Атап айтқанда, өндірістік бақылау бағдарламасы жүргізілмеген, кейбір қызметкерлердің медициналық кітапшасы болмаған, сондай-ақ мекеменің ресми ашылғаны туралы тиісті органдарға хабар берілмеген.
Қазіргі таңда полиция қаулысымен дәмхана жабылды, тергеу амалдары жүріп жатыр.
Cурет: Pexels.com
