Ұлттық статистика бюросы ел азаматтарының жалақысына қатысты дәстүрлі зерттеуін жариялады.
Сәуірде бюро барлық ірі, сондай-ақ орта және шағын кәсіпорындардың 30%-ын іріктеп, барлық ай бойы жұмыс істеген қызметкерлерге есептелген жалақы мөлшері бойынша жыл сайынғы зерттеу жүргізді.
Ресми мәліметке сүйенсек, 2024 жылы Қазақстандағы орташа жалақы – 285 677 теңгені құрады.
Ең жоғары жалақы темекі өнеркәсібінің қызметкерлерінде, олардың орташа айлық жалақысы – 1 279 000 теңгені құрайды. Екінші орында мұнай-газ өндіру саласының қызметкерлері, олардың орташа табысы – 1,1 миллион теңгеден асады.
Аймақтар бойынша ең жоғары орташа жалақы Атырау облысында тіркелген. Ондағы жалақы – 594 426 теңгені құрайды.
Орташа айлық жалақы алушылардың үлесі:
- 100 000 теңгеге дейін — 6,1% қызметкерлер;
- 100 001-ден 150 000 теңгеге дейін — 12%;
- 150 001-ден 300 000 теңгеге дейін — 35,1%;
- 300 001-ден 600 000 теңгеге дейін — 35,6%;
- 600 001-ден 900 000 теңгеге дейін — 6,9%;
- 900 001-ден 1 200 000 теңгеге дейін — 2,1%;
- 1 200 001-ден 1 500 000 теңгеге дейін — 1%;
- 1 500 001 теңгеден жоғары — 1,2%.
Жалақы айына бір миллион теңгеден асатын болса, ең көп жалақы алатын 3% қызметкердің қатарына енгізіледі.
Басшылардың жалақы деңгейі 2023 жылмен салыстырғанда 11,4%-ға өскен. Өндірістік жабдық операторлары, көлік жүргізушілері және құрастырушылардың жалақысы – 16%, ал фермерлер мен ауыл, орман және балық шаруашылығы жұмысшыларында 14,3% болып отыр.
Орта білімі бар қызметкерлердің орташа айлық жалақысы – 262 238 теңгені, жоғары білімділердікі – 438 005 теңгені және жоғары оқу орнынан кейінгі білімі барларда – 558 882 теңгені құрап отыр.
Қызметкерлердің жасына қарай бөлінісінде 16 жастан 24 жасқа дейінгі орташа айлық жалақы 250 518 теңгені, 25 жастан 34 жасқа дейінгілерде 347 985 теңгені, 35 жастан 44 жасқа дейінгілерде 397 468 теңгені, 45-тен 54 жасқа дейінгілерде 372 824 теңгені, 55 жастан 64 жасқа дейінгі азаматтарда 340 769 теңгені және 65-тен асқандарда орташа жалақы мөлшері 318 564 теңге құрады.
Сурет: freepik.com