Ұлттық банктің инфрақұрылымы арқылы тәулігіне орта есеппен 6,3 трлн теңге өтеді. Бұл туралы 2025 жылдың бірінші жартыжылдығындағы төлем қызметтері нарығының дамуына арналған есепте хабарланды.
Талдау нәтижесіне сәйкес, ұлттық төлем жүйелері арқылы жүргізілген транзакциялар саны 34,3%-ға артқан. Ұлттық банктің инфрақұрылымы арқылы тәулігіне орта есеппен 6,3 трлн теңге өтеді. Сондай-ақ төлем ұйымдары арқылы тауар айналымы 4,6 трлн теңгеге жеткен, ал антифрод-орталығы 2,5 млрд теңгенің алаяқтық әрекетінің алдын алған.
Естеріңізге сала кетейік, 2025 жылдың қыркүйегінде ұлттық банк қазақстандық үш банкпен бірлесіп банкаралық QR-төлемдер сервисін іске қосты.
Ұлттық банк төлем жүйелерін қадағалауды 2025 жылдан бастап қолға алды. Бұл жұмыс Қазақстан Республикасы «Ұлттық банк туралы» заңының 8 және 48-баптарына сәйкес жүргізіледі.
Қадағалау объектілеріне банкаралық ақша аудару және клиринг жүйелері, банктер арасындағы корреспонденттік қатынастар, төлем құралдары, төлем карталары мен халықаралық ақша аударымдары кіреді.
Ұлттық банктің төлем жүйелерін қадағалау (оверсайт) қызметі төлем инфрақұрылымының үздіксіз жұмысын, қауіпсіздігін және тиімділігін бақылауға бағытталған. Осы мақсатта ҰБ төлем жүйелерінің мониторингін жүргізуге, олардың жұмысын тексеруге және қатысушылардан ақпарат алуға құқылы.
фото: istockphoto.com
