Бірмандатты округ бойынша сайланған Мәжіліс депутаты Абзал Құспан Үкіметтің киік популяциясын реттеу мәселесіне немқұрайлы қарауын сынға алды.
Депутаттың айтуынша, бұл мәселе бұған дейін бірнеше рет көтерілгенімен Премьер-министр Әлихан Смайылов пен қазіргі үкімет басшысы Олжас Бектенов тарапынан ешқандай нақты шара қабылданбаған. Үкіметтің әрекетсіздігі ауыл шаруашылығына орасан зиян келтіріп отыр.
«Табиғи тепе-теңдікті сақтау жолында үкіметтің әрекетсіздігі ауыл шаруашылығына орны толмас зиян келтіріп отыр. Мемлекет басшысы Ұлттық құрылтайда киік популяциясының күрт өсуі ауыл шаруашылығына кері әсер етіп, экожүйеге артық салмақ түсіріп жатқанын атап өтті. Бұл мәселе бір күнде пайда болған жоқ. Аймақтардан атқарушы билікке жолданған жүздеген өтініш пен талап-арыз үкімет тарапынан жылдар бойы елеусіз қалып келеді», — деді депутат.
Абзал Құспан депутаттық сауалында киік популяциясын реттеу бойынша нақты шаралар қабылдауды талап етті. Ол 2025 жылы киік санын реттеу жұмыстарын жүргізу туралы ресми шешім қабылдап, оның әдістері мен экологиялық негіздемесін жариялауды сұрады. Бұл мәселеге жауапты мемлекеттік органды белгілеу қажеттігін атап өтті.
Депутат Кеңес Одағы кезінде киік үшін жауапты нақты мекеме болғанын, ал қазір мұндай ұйымның жоқтығын айтады. Оның пікірінше, киік өнімін халық шаруашылығына пайдалану үшін жауапты мекеме құру қажет. Абзал Құспан осыған дейін Қазақстанның батыс өңірінде киіктердің шамадан тыс көбеюінен жергілікті шаруалардың зардап шегіп отырғанын, қарапайым тұрғындардың сотталып жатқанын айтқан еді.
Киік тақырыбы sarapshy.info редакциясының басты назарында. Бұған дейін редакция киік аулаған аңшылармен сұхбаттасып, сарапшылармен де тақырыпты жан-жақты талқылап, экологтармен де сөйлесті. Шығыстанушы «Экософия немесе киелі табиғат» кітабының авторы Санжар Керімбаймен “Киік неге киелі?” тақырыбында подкаст та жазды.
Cурет: Мейірбек Тәжқұранов
