Қазақстан Республикасы Сыбайлас жемқорлыққа қарсы іс-қимыл агенттігінің Батыс Қазақстан облысы бойынша департаменті «Батыс су арнасы» ЖШС қызметінде сыбайлас жемқорлық тәуекелдеріне сыртқы талдауды бастады.
«Талдау шеңберінде соңғы 5 жылда сумен жабдықтауға, су бұруға, сондай-ақ су құбыры желілері мен кәріз сорғы станцияларын жөндеуге байланысты мәселелер зерделенетін болады», – деп хабарлады Сыбайлас жемқорлыққа қарсы іс-қимыл агенттігі.
Бұл талдау «Сыбайлас жемқорлыққа қарсы іс-қимыл туралы» заңның 8-бабына сәйкес жүргізіліп, сыбайлас жемқорлық құқық бұзушылықтарына ықпал ететін себептер мен жағдайларды анықтауға және оларды жоюға бағытталған.
Талдау 2025 жылы 11 наурызда басталып, бір айға созылады.
«Батыс Су Арнасы» — 1961 жылдан бері жұмыс істеп тұрған сумен жабдықтау және су бұру кәсіпорны. Ол Батыс Қазақстан облысы, әсіресе Орал қаласы мен оның маңындағы елді мекендерді сумен қамтамасыз етеді және кәріз жүйесін басқарумен айналысады. Қазіргі уақытта Орал қаласында су және кәріз желілері 60%–ға тозған.
Сурет: Орал апталығы
