Jusan Bank бір жылдан астам уақыт пайдаланылмаған жеке тұлғалардың банк шоттарын жабу туралы шешім қабылдады. Бұл шешім 2025 жылдың 1 наурызынан бастап күшіне енді.
Қандай шоттар жабылады?
Бір жылдан астам уақыт бойы қаражат түспеген және ешқандай қаржылық операциялар жүргізілмеген жеке тұлғалардың есепшоттары жабылады. Бұл өзгеріс 2019 жылдың 29 сәуірінен кейін Jusan Bank-та ашылған шоттарға, сондай-ақ бұрынғы АО «АТФ Банк»-те 2014 жылдың сәуірінен бастап ашылған шоттарға да қатысты. Төлем карталарына тіркелген шоттар да осы тізімге енеді.
Кімдерге әсер етпейді?
Әлеуметтік төлемдер мен мемлекеттік бюджеттен және әлеуметтік сақтандыру қорынан жәрдемақы алуға арналған шоттар жабылмайды.
Бұған дейін Kaspi.kz акционерлерінің бірі Вячеслав Ким Қаржы нарығын реттеу және дамыту агенттігіне Jusan Bank акцияларының 97,5%-ын сатып алуға өтінім бергенін растаған еді.
2025 жылғы 1 қаңтардағы KASE мәліметіне сәйкес, Вячеслав Ким Kaspi.kz-тің 20,39% акциясына және финтех холдингтің 22,27% үлесіне ие.
Jusan Bank-тің иесі – Ғалымжан Есенов. Ол банктің 19,67% акциясын тікелей, ал First Heartland Securities арқылы 77,86% акциясын жанама түрде иеленеді.
Cурет: kazvedomosti.kz
